რუსეთის შეიარაღებული ძალების მიერ სირიის ქალაქ იდლიბზე განხორციელებულ საჰაერო ირიშების შედეგად დაიღუპა მინიმუმ 20 და დაშავდა ათობით ადამიანი.

ამის შესახებ სირიის ადამიანის უფლებათა მონიტორინგის ცენტრი იტყობინება. უფლებადამცველების მონაცემებით, გარდაცვლილთა შორის სამი ბავშვია.

ორგანიზაციის თანახმად, იდლიბში დაიბომბა რამდენიმე რაიონი, მათ შორის საავადმყოფოს მიმდებარე ტერიტორია. უფლებადამცველი ორგანიზაციის ინფორმაციით, სავარაუდოდ რუსულმა ავიაციამ სულ მცირე შვიდი დარტყმა განახორციელა.

სირიის ადამიანის უფლებათა მონიტორინგის ცენტრის მიერ გამოქვეყნებული სტატისტიკის თანახმად, სირიაში რუსეთის სამხედრო ოპერაციის დაწყებიდან რუსული ავიაციის იერიშებს 2099 სამოქალაქო პირი, მათ შორის 500 ბავშვი, ემსხვერპლა.