ISIS ევროპის ჩემპიონატზე, ინგლისისა და რუსეთის ნაკრებებს შორის მატჩისას თავდასხმას გეგმავს

მსოფლიო - 13:52, 30 May, 2016

6374

რადიკალური ისლამისტური დაჯგუფება "ისლამური სახელმწიფო“ ქალაქ მარსელში, ფეხბურთში ევროპის 2016 წლის ჩემპიონატის ფარგლებში ინგლისისა და რუსეთის ნაკრებებს შორის დაგეგმილი მატჩის დროს, თავდასხმას გეგმავს. ამის შესახებ გამოცემა The Sun-ი წერს.

გამოცემის თანახმად, აღნიშნული ინფორმაცია პოლიციამ პარიზისა და ბრიუსელის ტერაქტებში ეჭვმიტანილი, სალაჰ აბდესლამის კუთვნილ კომპიუტერში აღმოაჩინა, სადაც აღნიშნულია რომ სამიზნე იქნება ინგლისელი გულშემატკივარი.
გავრცელებული ცნობით, იგეგმება თვითმკვლელი ტერორისტების, ქიმიური იარაღით სავსე ე.წ დრონებისა და სხვა იარაღის გამოყენება.

რუსეთ-ინგლისის მატჩი 11 ივნისს არის დაგეგმილი.

შეგახსენებთ, 13 ნოემბერს პარიზის ცენტრში განხორციელებული 6 კოორდინირებული ტერაქტის მსხვერპლი 129 ადამიანი გახდა. ტერაქტებზე პასუხისმგებლობა რადიკალურმა ექსტრემისტულმა დაჯგუფება "ისლამურმა სახელმწიფომ" აიღო.

26 წლის სალაჰ აბდესლამი, რომელიც ბელგიაში დაბადებული ფრანგია, 4თვიანი ძებნის შემდეგ 18 მარტს ბრიუსელში, მოლენბეკის კომუნაში დააკავეს. ამჟამად აბდესლამი საფრანგეთის ციხეში იმყოფება და გამოძიებასთან თანამშრომლობაზე უარს აცხადებს.