EgyptAir-ის ლაინერის ფრაგმენტებისა და მგზავრთა ცხედრების ნაწილების ანალიზი, აფეთქებაზე მეტყველებს

მსოფლიო - 14:13, 24 May, 2016

5045

ეგვიპტური ავიაკომპანია EgyptAir-ის კუთვნილის თვითმფრინავის ნამსხვრევებისა და მგზავრთა ცხედრების ნაწილების ანალიზის შედეგები, ლაინერის ბორტზე მომხდარ აფეთქებაზე მიუთითებს. AP-ის ცნობით, ამის შესახებ ეგვიპტის სასამართლო ექსპერტებმა განაცხადეს, რომლებმაც ხმელთაშუა ზღვაში ჩავარდნილი თვითმფრინავის ნაწილები და ნაპოვნი მგზავრების ცხედრების 80 ფრაგმენტი შეისწავლეს.

ექსპერტთა განცხადებით, ყველა ნაშთი პატარა ზომის იყო და ნაპოვნ სხეულის ნაწილებს შორის, არც ერთი არ აღმოჩნდა მთელი. ექსპერტთა თქმით, რომელიც საგამოძიებო ჯგუფის ნაწილია, ბორტზე სავარაუდოდ ასაფეთქებელი მოწყობილობა აფეთქდა. თუმცა ისინი „შავი ყუთის“ გაშიფვრას დაელოდებიან, რომელსაც EgyptAir-ის წარმოამდგენლის განცხადებით, ხმელთაშუა ზღვის ფსკერიდან სავარაუდოდ ორი დღის განმავლობაში ამოიტანენ. თუ "შავი ყუთი" დაზიანებული იქნება, მაშინ მას ევროპაში გაშიფრავენ.

ავიაკომპანია Egypt Air-ის კუთვნილი სამგზავრო Airbus A320, რომელიც ფრენას პარიზიდან ქაიროს მიმართულებით ასრულებდა , კაიროს საჰაერო სივრცესთან მოახლოებისას 19 მაისს გაუჩინარდა.

თვითმფრინავის ბორტზე 66 ადამიანი - 56 მგზავრი და ეკიპაჟის 10 წევრი იმყოფებოდა.

ორდღიანი ძებნის შემდეგ, გაუჩინარებული ლაინერის ფრაგმენტები და მგზავრთა პირადი ნივთები ხმელთაშუა ზღვაში, ქალაქ ალექსანდრიიდან ჩრდილოეთით, 290 კილომეტრში აღმოაჩინეს.

კატასტროფის შედეგად ყველა მგზავრი დაიღუპა.

ეგვიპტის სამოქალაქო ავიაციის მინისტრის შარიფ ფატჰის განცხადებით კი, ეგვიპტური ავიაკომპანიის კუთვნილი სამგზავრო ლაინერის გაუჩინარების მიზეზი ტერაქტი ან მექანიკური დაზიანება უფროა, ვიდრე ტექნიკური გაუმართაობა.

კატასტროფამდე რამდენიმე წუთით ადრე ავიალაინერის სალონში კვამლის დეტექტორი ამუშავდა. აღნიშნული ინფორმაცია საფრანგეთის საავიაციო ინციდენტების გამოძიებისა და ანალიზის ბიურომ დაადასტურა.