EgyptAir-ის თვითმფრინავის "შავი ყუთების" მოსაძებნად წყალქვეშა ნავი გაგზავნეს

მსოფლიო - 10:15, 23 May, 2016

2186

ეგვიპტის პრეზიდენტის აბდელ ფათაჰ ალ-სისის განცხადებით, ხმელთაშუა ზღვაში, ეგვიპტური ავიაკომპანია EgyptAir-ის თვითმფრინავის ჩამოვარდნის სავარაუდო ადგილას "შავი ყუთების" მოსაძებნად, წყალქვეშა ნავი გაგზავნეს.

მისი თქმით, გაგზავნილ წყალქვეშა ნავს წყალში სამი კილომეტრის სიღრმეზე შეუძლია ჩასვლა.

ეგვიპტის პრეზიდენტის თქმით, ამჟამად Airbus A320-ის კატასტროფის გამომწვევი მიზეზების ყველა ვერსია განიხილება და დასკვნების გაკეთება ნაადრევია. როგორც ალ-სისიმ განაცხადა, გამოძიებას დროს დასჭირდება.

ავიაკომპანია Egypt Air-ის კუთვნილი სამგზავრო Airbus A320, რომელიც ფრენას პარიზიდან ქაიროს მიმართულებით ასრულებდა , კაიროს საჰაერო სივრცესთან მოახლოებისას 19 მაისს გაუჩინარდა.

თვითმფრინავის ბორტზე 66 ადამიანი - 56 მგზავრი და ეკიპაჟის 10 წევრი იმყოფებოდა.

ორდღიანი ძებნის შემდეგ, გაუჩინარებული ლაინერის ფრაგმენტები და მგზავრთა პირადი ნივთები ქალაქ ალექსანდრიიდან ჩრდილოეთით, 290 კილომეტრში აღმოაჩინეს.

ეგვიპტის პრეზიდენტის აბდელ ფათაჰ ალ-სისის ინფორმაციით, EgyptAir-ის სამგზავრო ლაინერის, А320-ის კატასტროფის შედეგად ყველა მგზავრი დაიღუპა.

ეგვიპტის სამოქალაქო ავიაციის მინისტრის შარიფ ფატჰის განცხადებით კი, ეგვიპტური ავიაკომპანიის კუთვნილი სამგზავრო ლაინერის გაუჩინარების მიზეზი ტერაქტი ან მექანიკური დაზიანება უფროა, ვიდრე ტექნიკური გაუმართაობა.

კატასტროფამდე რამდენიმე წუთით ადრე ავიალაინერის სალონში კვამლის დეტექტორი ამუშავდა. აღნიშნული ინფორმაცია საფრანგეთის საავიაციო ინციდენტების გამოძიებისა და ანალიზის ბიურომ დაადასტურა. ავიაკომპანიის წარმომადგენელის განცხადებით კი , გაუჩინარებიდან დაახლოებით 2 საათში განგაშის სიგნალი დაფიქსირდა.