ჩრდილოატლანტიკურ ალიანსს არ სურს ახალი ცივი ომი რუსეთთან, განაცხადა NATO-ს გენერალურმ მდივანმა იენს სტოლტენბერგმა პოლონურ ტელეარხ TVN-თან ინტერვიუში.

"ჩვენ ვხედავთ, რომ რუსეთი ბოლო დროს საკმაოდ დიდ ინვესტიციებს ახორციელებს საკუთარი შეიარაღებული ძალების განვითარებაში, წინა წლებისაგან განსხვავებით. NATO ამაზე მხოლოდ რეაგირებს და საკუთარ თავდაცვას აძლიერებს. ამასთან ცდილობს თავი აარიდოს გართულებებს და ხელი შეუწყოს ღია დიალოგს, განაცხადა სტოლტენბერგმა და დასძინა, რომ ამჟამად ალიანსი ვერ ხედავს რუსეთიდან ღია საფრთხეს წევრი ქვეყნების მისამართით.

"ეს არ არის არც სტრატეგიული პარტნიორობა, რომლის აშენებასაც ჩვენ ვცდილობდით ცივი ომის დასრულების შემდეგ და არც ღია კონფრონტაციაა, რადგან ახალი ცივი ჩვენ არ გვსურს," - ხაზი გაუსვა გენერალურმა მდივანმა.

სტოლტენბერგმა აღნიშნა, რომ NATO-ს აღმოსავლეთ ფლანგის გაძლიერება არის ცხადი სიგნალი, რომ ალიანსი დაიცავს თავის წევრებს. უფრო კონკრეტული გადაწყვეტილება ამ საკითხთან დაკავშირებით ვარშავის სამიტზე იქნება მიღებული.