ხმელთაშუა ზღვაში EgyptAir-ის თვითმფრინავის ნამსხვრევები და მგზავრთა პირადი ნივთები აღმოაჩინეს

მსოფლიო - 13:42, 20 May, 2016

2135

ხმელთაშუა ზღვაში ეგვიპტური ავიაკომპანია EgyptAir-ის სამგზავრო ლაინერის, А320-ის ფრაგმენტები და მგზავრთა პირადი ნივთები აღმოაჩინეს. „ბიბისის“ ცნობით, ამის შესახებ ეგვიპტის სამხედრო-საზღვაო ძალების ოფიციალურმა წარმომადგენელმა განაცხადა.

მისი ინფორმაციით, გაუჩინარებული ლაინერის ფრაგმენტები ქალაქ ალექსანდრიიდან ჩრდილოეთით, 290 კილომეტრში აღმოაჩინეს. გამოცემის თანახმად, აღნიშნული ინფორმაცია დაადასტურა EgyptAir-ის წარმომადგენელმაც.

ხმელთაშუა ზღვაში სამძებრო ოპერაცია გუშინდელი დღიდან მიმდინარეობდა და მასში ეგვიპტის, საბერძნეთის, დიდი ბრიტანეთის, საფრანგეთის, კვიპროსის, იტალიისა და აშშ-ის ხომალდები და ვერტმფრენები მონაწილეობდნენ.

გუშინ გავრცელდა ინფორმაცია, რომ მაშველებმა ლაინერის ფრაგმენტები და 2 მგზავრის ცხედარი აღმოაჩინეს, თუმცა საბერძნეთის საჰაერო ინციდენტების მთავარმა გამომძიებელმა ატანასიოს ბინისმა დღეს ინფორმაცია უარყო.შეგახსენებთ, ავიაკომპანია Egypt Air-ის კუთვნილი სამგზავრო Airbus A320, რომელიც ფრენას პარიზიდან ქაიროს მიმართულებით ასრულებდა , კაიროს საჰაერო სივრცესთან მოახლოებისას გუშინ გაუჩინარდა.

თვითმფრინავის ბორტზე 66 ადამიანი - 56 მგზავრი და ეკიპაჟის 10 წევრი იმყოფებოდა.

ავიაკომპანიის წარმომადგენელის განცხადებით, გაუჩინარებიდან დაახლოებით 2 საათში განგაშის სიგნალი დაფიქსირდა.