ხმელთაშუა ზღვაში, სავარაუდოდ, გაუჩინარებული ეგვიპტური ლაინერის ორი მგზავრის ცხედარი აღმოაჩინეს

მსოფლიო - 17:53, 19 May, 2016

2830

ხმელთაშუა ზღვაში მაშველებმა ორი ცხედარი იპოვეს, რომლებიც სავარაუდოდ, გაუჩინარებული ეგვიპტური სამგზავრო ლაინერის მგზავრებს ეკუთვნის. ამის შესახებ ინფორმაციას ტელეგრაფი ავრცელებს.რამდენიმე წუთის წინ "როიტერსმა" ინფორმაცია გაავრცელა, რომ ზღვაში, ლაინერის ფრაგმენტები აღმოაჩინეს.

ფრაგმენტები ნაპოვნია კუნძულ კარპატოსიდან 80 კილომეტრში, სადაც ლაინერი რადარებიდან გაქრა.

აღნიშნულთან დაკავშირებით ოფიციალურ პირებს განცხადებები ჯერჯერობით არ გაუკეთებიათ. სამძებრო სამუშაოებში ეგვიპტის, საბერძნეთისა და საფრანგეთის წარმოამდგენლობები არიან ჩართულები.

ავიაკომპანია Egypt Air-ის კუთვნილი სამგზავრო Airbus A320, რომელიც ფრენას პარიზიდან ქაიროს მიმართულებით ასრულებდა , კაიროს საჰაერო სივრცესთან მოახლოებისას გაუჩინარდა.

თვითმფრინავის ბორტზე 66 ადამიანი - 56 მგზავრი და ეკიპაჟის 10 წევრი იმყოფებოდა.

ავიაკომპანიის წარმომადგენელის განცხადებით, გაუჩინარებიდან დაახლოებით 2 საათში განგაშის სიგნალი დაფიქსირდა.

საბერძნეთის თავდაცვის მინისტრის, პანოს კამენოსის განცხადებით, გაუჩინარებამდე, ეგვიპტური ავიაკომპანიის კუთვნილმა სამგზავრო თვითმფრინავმა რამდენიმე მკვეთრი მანევრი გააკეთა და დაშვება დაწყო.

ეგვიპტის სამოქალაქო ავიაციის მინისტრის შარიფ ფატჰის განცხადებით კი, ეგვიპტური ავიაკომპანიის კუთვნილი სამგზავრო ლაინერის გაუჩინარების მიზეზი ტერაქტი ან მექანიკური დაზიანება უფროა, ვიდრე ტექნიკური გაუმართაობა.