საბერძნეთში ორი ქართველი ახალგაზრდას ბერად აღკვეცის ფაქტს საქართველოს საპატრიარქო განცხადებით ეხმაურება. როგორც განცხადებაშია ნათქვამი სასულიერო პირი, რომელმაც აღნშნული ახალგაზრდების ბერად აღკვეცა განახორციელა არის საბერძნეთის ეკლესიის მღვდელმსახური და მას საქართველოს ეკლესიის წევრების აღკვეცა საქართველოს საპატრიარქოს სათანადო ნებართვის გარეშე არ უნდა განეხორციელებინა. საპატრიარქოს განცხადებას „ნიუპოსტი“ უცვლელად გთავაზობთ:

„უკვე სამი დღეა ინტერნეტ-სივრცეში დაიდო ინფორმაცია თბილისის სასულიერო სემინარიის II კურსის სტუდენტ მათე შენგელიას და ახალგაზრდული ევროპარლამენტის წევრ, მეთორმეტე კლასის მოსწავლე გიორგი ქათამაძის შესახებ, რომლებიც საბერძნეთში არქიმანდრიტ დიონისეს (გვარად კოლუმბოკასი) მიერ დიდ სქემაში აღიკვეცნენ. პირადი საუბრებით ვრცელდება ინფორმაცია იმის თაობაზეც, თითქოს ეს სრულიად საქართველოს კათოლიკოს-პატრიარქის ლოცვა-კურთხევით მოხდა, რაც რეალობას არ შეესაბამება.

ეს ორი ახალგაზრდა ადრე სხვა და სხვა ღონისძიებაზე რამდენჯერმე ესტუმრა საპატრიარქოს. მათდამი იყო კეთილგანწყობა, მაგრამ აღნიშნულ თემაზე საუბარი არასოდეს არავისთან შემდგარა.

ახლახანს კი ისინი, უკვე აღკვეცილები წარუდგნენ მის უწმინდესობას სამების საკათედრო ტაძარში წირვის დროს და იქ უთხრეს მომხდარის შესახებ.

შევნიშნავთ, რომ არქიმანდრიტი დიონისე (კოლუმბოკასი) არის საბერძნეთის ეკლესიის მღვდელმსახური და მას საქართველოს ეკლესიის წევრების აღკვეცა არ უნდა განეხორციელებინა ჩვენის მხრიდან სათანადო ნებართვის გარეშე; მით უმეტეს აღნიშნული პიროვნებები არიან 18-20 წლისანი და მორჩილად ყოფნის პერიოდიც არა აქვთ გავლილი.

არქიმანდრიტ დიონისესაგან ეს არის მორიგი სერიოზული დარღვევა და უხეში არასწორი ქმედება.

დიდ-სქემოსანმა ბერმა ირინეოსმა, (იგივე მათე შენგელიამ) და დიდ-სქემოსანმა ბერმა იერონიმემ (იგივე გიორგი ქათამაძემ) არჩევანი თვითონ გააკეთეს და ისინი ამიერიდან საქართველოს ეკლესიის იურისდიქციას აღარ ეკუთვნიან.»- აღნიშნულია განცხადებაში.

შეგახსენებთ ინტერნეტში გავრცელდა ევროპელ დიპლომატთა ასოციაციის დელეგატი ევროპის პარლამენტსა და ევროსაბჭოში, ყველაზე ახალგაზრდა ქართველი დიპლომატის 18 წლის გიორგი ქათამაძის წერილი, რომელშიც ის დედას ბერად აღიკვეცის შესახებ ატყობინებდა.