გადაცემა "პოზიციაში" საუბრის დროს მიხეილ სააკაშვილმა განაცხადა, რომ მისთვის მძიმე სანახავი იყო კოდორის ხეობის ის კადრები, სადაც ჩანდა, როგორ აფრიალებდნენ აფხაზურ დროშას:

"რა თქმა უნდა, რუსეთს არ აინტერესებდა ცხინვალი, რუსეთს აინტერესებდა საქართველო. რუსებმა მიიღეს ქვების გროვა და ეს მართლაც ასეა, რუსეთის გადმოსახედიდან სწორედ ეგაა სოფელი თამარაშენი და ქურთა, სადაც მრავალი რამ ავაშენეთ, გავიყვანეთ გზები... მე გული მისკდება, როცა ვუყურებ კადრებს, როცა ეს ნაძირლები კოდორის ხეობაში აფხაზეთის დროშებს აფრიალებენ. რა თქმა უნდა, ჩემთვის ძვირფასია ყოველი გოჯი ამ მიწის და რომ იყოს არჩევანი, ერთი სოფლის დაბრუნებისთვის ჩემს სიცოცხლეს დავდებდი. მაგრამ რუსეთმა რა მოიგო სტრატეგიულად? სტრატეგიულად ძალიან ბევრი რამ დაკარგა, დაკარგა სამშვიდობო სტატუსი, რუსეთი ყოველდღიურად ემზადებოდა ამ ომისთვის. 2008 წელს საქართველოში უკვე შემოსული იყო 100 ათასზე მეტი ჯარისკაცი, 200 თვითმფრინავი, შავი ზღვის ფლოტი უკვე დაძრული იყო, ომის მანქანა იყო მოყვანილი მოქმედებაში... როცა ამხელა მანქანაა ამოქმედებული, მისთვის სულ ერთია, რა საბაბით შემოვა. დიახ, შეიძლებოდა ამ ომის აცილება, თუ ჩვენ უარს ვიტყოდით სახელმწიფოებრიობაზე", - განაცხადა მიხეილ სააკაშვილმა "პოზიციაში".