საფრანგეთში, 17-მა პოლიტიკოსმა ქალბატონმა, რომლებიც სხვადასხვა დროს ქვეყნის მინისტრების პოსტებს იკავებდნენ, განაცხადა, რომ აღარ გაჩუმდებიან იმ "სექსიზმის" შესახებ, რომელიც პოლიტიკურ წრეებში არის გამეფებული.

მინისტრი ქალბატონები, რომლებიც სხვადასხვა პოლიტიკურიო პარტიების წევრები არიან, აცხადებენ, რომ მას შემდეგ, რაც გარკვეულ წარმატებას მიაღწიეს პოლიტიკურ კარიერაში, მათ მამაკაცი კოლეგების მხრიდან სექსუალური ურთიერთობის დამყარების არაერთი შეთავაზება მიიღეს. შეთავაზების საფუძველი, როგორც წესი შემდგომი კარიერული წინსვლა იყო.

მათი განცხადებით, ამგვარ დამოკიდებულებას ბოლო უნდა მოეღოს, რაც კანონმდებლობით უნდა იყოს განმტკიცებული.

პოლიტიკოსი ქალბატონების ეს პროტესტი გასულ კვირას მომხდარმა ფაქტმა გამოიწვია - საფრანგეთის პარლამენტის ქვედა პალატის ვიცე-სპიკერი, მწვანეთა პარტიის წარმომადგენელი დენი ბოლენი დაკავებული თანამდებობიდან გადადგა, მას შენმდეგ, რაც კოლეგა ქალბატონებმა ის სექსუალური ურთიერთობების დამყარების მცდელობაში დაადანაშაულეს. კერძოდ, მისმა თანაპარტიელმა სანდრინ რუსომ განაცხადა, რომ ბოლენმა დერეფანში მას მკერდზე მოკიდა ხელი.