ამის შესახებ ექსკლუზიურად "ნიუპოსტს" ჭუბერში მცხოვრებმა ადგილობრივმა თვითმხილველმა შეატყობინა, რომელმაც ვინაობის გამჟღავნება არ ისურვა. მისი თქმით, ინციდენტის შედეგად არავინ დაზარალებულა, მომხდარიდან რამდენიმე საათში კი ბაზაზე მესტიის პოლიციის სამმართველოს თანამშრომლები მივიდნენ, რომლებმაც იქ დაახლოებით ერთ საათს დაჰყვეს:

"ყვირილი დაიწყო და მალე ჩხუბში გადაიზარდა. მერე ორი ჯგუფი გამოიკვეთა, ერთმანეთს ურტყამდნენ. მოგვიანებით იარაღებიც ამოიღეს და ისროდნენ, ალბათ, ჰაერში, რადგან არავინ წაქცეულა. ბაზასთან ახლოს ვიყავი და ვხედავდი, ისიც მესმოდა, როგორ ყვიროდნენ - არ მიეკარო, ხელყუმბარა გახსნაო.

მართალი გითხრათ, მე ხელყუმბარა არ მინახავს, ცოტა შორი იყო იქამდე. არც აფეთქების ხმა გამიგია. მაგრამ რომ ისროდნენ, ჩემი თვალით ვნახე", - ამბობს თვითმხილველი, ვისთვისაც უცნობია დაპირისპირების მიზეზები.

თვითმხილველის თქმით, ინციდენტი დაახლოებით ნახევარ საათს გრძელდებოდა, შემდეგ ყველაფერი მიწყნარდა, რამდენიმე საათის შემდეგ კი ბაზას პოლიციის მაღალი გამავლობის მანქანით, სავარაუდოდ, მესტიის პოლიციის სამმართველოს თანამშრომლები მიადგნენ, რომლებიც მალევე უკან გაბრუნდნენ.

ინციდენტის შესახებ ოფიციალური განცხადება შსს-ს არ გაუვრცელებია. "ნიუპოსტი" დაუკავშირდა შსს-ს საზოგადოებასთან ურთიერთობის დეპარტამენტის ხელმძღვანელს ნინო გიორგობიანს, რომელმაც განაცხადა, რომ ამ შემთხვევის შესახებ არაფერი იცის, ამავე დროს, ზემოთაღნიშნული ინციდენტის არსებობა არც დაადასტურა და არც უარყო: "ამ შემთხვევაზე ვერაფერს გეტყვით, რადგან არაფერი ვიცი", - განუცხადა ნინო გიორგობიანმა "ნიუპოსტს" მას შემდეგ, რაც ინციდენტის დეტალები მოისმინა.

შეგახსენებთ, რომ ჭუბერი მესტია-საკენის გზაზე უკანასკნელი სოფელია, რომელიც ქართული მხარის მიერ კონტროლდება. ამ სოფლის შემდეგ ჭუბერის უღელტეხილი იწყება, შესაბამისად, დაუსახლებელი ტერიტორიით. 2008 წლის აგვისტოს შემდეგ, რაც ზემო აფხაზეთი ოკუპირებულია, სოფელ ჭუბერში ერთმანეთს ენაცვლებიან შსს-ს დანაყოფები, რომლებიც იქ არიან ბაზირებული, ქართული მხარის მიერ კონტროლირებადი ტერიტორიისა და მოსახლეობის დაცვის მიზნით.

ლაშა ბერულავა