ახალაიას ადვოკატების განცხადებით, პროკურატურა მტკიცებულებების ფალსიფიკაციასაც ახდენს. რომეო საჯაიას განცხადებით, ბრალდების დადგენილება დაცვის მხარეს ჩაბარდა პროკურორის ხელმოწერის გარეშე, ხოლო სასამართლოს წარედგინა ხელმოწერით, რაც მის ფალსიფიკაციაზე მეტყველებს.

ასევე გაყალბებაზე მეტყველებს ის ფაქტიც, რომ ბრალდების 38-ვე მოწმის ჩვენება სრულიად იდენტურია.

დღევანდელ პროცესზე ახალაიას ადვოკატებმა ბრალდების დადგენილებისა და სხვა რიგი მტკიცებულების დაუშვებლად ცნობის შუამდგომლობა დააყენეს, რაზეც მოსამართლე გადაწყვეტილებას 17 აპრილს ჩანიშნულ სხდომაზე მიიღებს.

ბაჩო ახალაიამ პროცესზე მის მიმართ ბრალდების შეფასება გააკეთა: "ვერავინ ვერ დაადასტურებს იმას, რომ ბრალის წარდგენა ჩემთვის აუცილებელი იყო. ეს მოხდა სხვა პროცესის შიშით, რომ არ მომხდარიყო ჩემი გათავისუფლება სხვა სასამართლო პროცესიდან, სრულიად ლოგიკურია, რომ ბრალის წარდგენა მოხდა შეცდომებით. სასამართლომ ეს უნდა გაითვალისწინოს", - განაცხადა ბაჩო ახალაიამ პროცესზე.

ახალაიას მეორე ადვოკატმა, მალხაზ ველიჯანაშვილმა განაცხადა, რომ სპეცრაზმელებს ჩაუტარდათ რეინჯერთა კურსი, რომელიც მათი მხრიდან წამებად არის აღქმული. ამასთან მისი ინფორმაციით, არსებობს ვიდეომასალა, რომლის დაშვებაც დაცვის მხარემ პროცესზე მოითხოვა. ადვოკატების განცხადებით, ვიდეომასალაზე ასახულია რეინჯერების მომზადების წესი და ეს წესი საერთაშორისოდ არის აღიარებული.