1 წლამდე ბავშვები შებინდების მერე სასეირნოდ აღარ გაიყვანოთ- რეკომენდაციები სეზონურ ინფექციებთან დაკავშირებით

ჯანმრთელობა - 13:57, 11 May, 2016

57585

დაავადებათა კონტროლის ეროვნული ცენტრის სამეცნიერო ხელმძღვანელი პაატა იმნაძე ზაფხულის მოახლოებასთან დაკავშირებით მოსახლეობას რეკომენდაციებით მიმართავს. პაატა იმნაძემ დღეს გამართულ პრესკონფერენციაზე სეზონურ ინფექციებზე ისაუბრა და ყურადღება ლეიშმანიოზსა და მალარიაზე გაამახვილა, როგორც იმნაძემ აღნიშნა აღმოსავლეთ საქართველოში ლეიშმანიოზის რამდენიმე ათეული შემთხვევა ვლინდება. იმნაძის თქმით, დაავადების გადამტანი მწერები შებინდებისას გამოდიან და მათი ნაკბენის შემჩნევა შეუძლებელია. , კბენის შემთხვევები ივნისის მეორე ნახევრიდან იწყება, ხოლო დაავადების გამოვლენა შემოდგომის ბოლოს ხდება.

პაატა იმნაძე მშობლებს ურჩევს წლამდე ასაკის ბავშვები შებინდების მერე სასეირნოდ არ გაიყვანონ, რადგან ლეიშმანიოზის გამომწვევი მწერი სწორედ შებინდების მერე დაფრინავს. წლის ზემოთ ბავშვებს კი მწერების დამაფრთხობელი საშუალება წაუსვან და ღია დაუცველი კანით არ გაასეირნონ. ასევე ერთ-ერთი რეკომენდაცია ფანჯრებზე მწერებისგან დამცავი ბადეების გაკეთებაა.

,,ლეიშმანიოზის გამომწვევი მწერი შებინდებისას აქტიურდება, აქედან გამომდინარე, კარგი იქნება, თუ 1 წლამდე ბავშვებს დაუცველი კანით შებინდების მერე სასეირნოდ აღარ გამოიყვანენ. ლეიშმანიოზი კოღოზე პატარა მწერია, ფლებოტომუსი ჰქვია და ქინქლაზე ოდნავ დიდია. ის საფრთხეს ძირითადად ბავშვებისთვის წარმოადგენს. მოზარდებშიც საშიშია, თუმცა იმ შემთხვევაში, თუ მათ რაიმე იმუნური სისტემის დარღვევა აქვთ. ძირითადი რეზერვუარი ძაღლია. ამიტომაც თუ ძაღლი გყავთ, ვეტერინარს შეამოწმებინეთ“, - განაცხადა პაატა იმნაძემ.

იმნაძის თქმით, საქართველოში ბოლო რამდენიმე წელია მალარიის ადგილობრივი შემთხვევები არ ვლინდება.

,,ეს დაავადება ქვეყანაში არ გვაქვს, მაგრამ კოღო არის, ამიტომ თუ ის გავრცელდა, ესე იგი შემოიტანეს“, - განაცხადა პაატა იმნაძემ, მისი თქმით ჯანდაცვის და სოფლის მეურნეობის სამინისტროები საქართველოს შავი ზღვისპირეთში ფართომასშტაბიან სადეზინფექციო სამუშაოებს გეგმავენ.

პაატა იმნაძის განცხადებით, იგი არ ელოდება საქართველოში ზიკას, დენგეს და ჩიკუნგუნიას ინფექციების გავრცელებას. რაც შეეხება ბოტულიზმს, იმნაძე მოსახლეობას ურჩევს, ნუ დაამზადებენ ისეთი პროდუქტების კონსერვს, რისი თერმულად დამუშავებაც გახსნის შემდეგ აღარ შეიძლება. ასევე, იმნაძის რჩევაა, მალფუჭებადი პროდუქტები მაცივარში შეინახონ, ხოლო ბუნებაში გასვლისას, წყალი ბოთლიდან მიიღონ.