მეუფე დანიელი - ,,როგორც კი რწმენა შეირყევა, ვცილდებით უფალს და ვკარგავთ ბოროტების დამარხების დიდ სიმდიდრეს“

რელიგია - 18:23, 08 May, 2016

3998

კვირაცხოვლობის დღესთან დაკავშირებით სამების საკათედრო ტაძარში იქადაგა ჭიათურა-საჩხერის მიტროპოლიტმა, მეუფე დანიელმა. მიტროპოლიტმა ადამიანში რწმენის მნიშვნელობაზე ისაუბრა და მაგალითად თომა მოციქულის სახარებისეული ეპიზოდი მოიყვანა.

,,დღევანდელი დღე გამოირჩევა იმით, რომ ამ დღეს იკითხება სახარება, რომელიც მოგვითხრობს იმ ეჭვის შესახებ, რომელიც თომა მოციქულს გაუჩნდა. როდესაც მოწაფეებს აღდგომილი მაცხოვარი გამოეცხადა, იქ თომა არ იყო. მას ძალიან უნდოდა თავად ეხილა უფალი და თქვა - ვიდრე მე არ ვიხილავ და ჩემი ხელით არ შევეხები უფლის სხეულზე არსებულ ჭრილობებს, გამიჭირდება ვირწმუნო. და, აი დღევანდელ დღეს, აღდგომის სწორზე შემდგომ კვირას უფალი მოწაფეებს კვლავ გამოეცადა და მათ შორის იყო თომაც. უფალმა მიმართა თომას და უთხრა - მოვედ თომა, შეეხე ჩემს ჭრილობებს და ნუ იქნები ურწმუნო, არამედ რწმენით. ამ სიტყვების მოსმენისას თომა მუხლებზე დაემხო და შეჰღაღადა - უფალი ჩემი და ღმერთი ჩემი. ეს არის განკურნება მცირედ მორწუნეობისა. შეიძლება ყოველ ადამიანში, რაღაც წამში გაჩნდეს მერყეობა სარწმუნოებაში, გაჩნდეს ყოყმანი და ჩვენ უნდა გვახსოვდეს, რომ უპირველესი საფუძველი ჩვენი ღმერთთან კავშირისა, ჩვენი სულიერი ძალებით აღვსებისა, ჩვენი ცოდვაზე გამარჯვებისა, ჩვენში სათნოებათა სრულყოფისა, არის კავშირი ღმერთთან, ხოლო ეს კავშირი მყარდება რწმენით. როგორც კი რწმენა ოდნავ მაინც შეირყევა, როგორც კი რწმენა მერყეობას იწყებს, უფალს ვცილდებით და იმ დიდ სიმდიდრეს ვკარგავთ, რომელსაც ქვეყანაზე ყველა ბოროტების დამარცხება შეუძლია. რწმენით მკვიდრდება მადლი აღდომისა, ხოლო აღდგომა ეს არის სიცოცხლის გამარჯვება სიკვდილზე, სიკეთის - ბოროტებაზე, სიყვარულის - სიძულვილზე”, - განაცხადა მეუფე დანიელმა.