რუსეთმა სავჩენკოს უკრაინისთვის გადაცემის სანაცვლოდ საკუთარი პირობა დაასახელა

მსოფლიო - 17:30, 04 May, 2016

6531

რუსეთის სასჯელაღსრულების ფედერალური სამსახური, რუსეთის პატიმრობაში მყოფი უკრაინელისამხედრო მფრინავის, ნადეჟდა სავჩენკოს კიევისთვის გადაცემის დოკუმენტებს სასამართლოში იმ შემთხვევაში გადააგზავნის, თუკი უკრაინული მხარე განაჩენის აღსრულებას უზრუნველყოფს.

“იმ შემთხვევაში, თუ უკრაინის იუსტიციის სამინისტრო წარმოადგენს გარანტიებს მსჯავრდებულის მიმართ რუსეთის სასამართლოს მიერ გამოტანილი განაჩენის აღსრულების შესახებ, რუსეთის სასჯელაღსრულების ფედერალური სამსახური სასამართლოს მიმართავს”,- ნათქვამია უწყების განცხადებაში.

ცოტა ხნის წინ კი, ნადეჟდა სავჩენკოს ადვოკატმა განაცხადა, რომ სავჩენკომ, უკრაინისთვის მისი გადაცემისთვის საჭირო ყველა დოკუმენტი შეავსო. დოკუმენტებში სავჩენკომ დანაშაულის აღიარებაზე უარი განაცხადა, თუმცა სასამართლოს მიერ დაკისრებული ჯარიმის 30 ათასი რუბლის გადახდას თანახმდა.

სავჩენკოს განცხადებით, ის მშრალ შიმშილობას ისევ დაიწყებს, თუ უკრაინისთვის მისი გადაცემის პროცესი გაჭიანურდება.

შეგახსენებთ, რუსეთის ქალაქ დონეცკის სასამართლომ ნადეჟდა სავჩენკო, რუსი ჟურნალისტების მკვლელობაში დამნაშავედ ცნო და მას 22 წლით თავისუფლების აღკვეთა მიუსაჯა.

სავჩენკოს ბრალად ედება იმ რუსი ჟურნალისტების მკვლელობა, რომლებიც უკრაინაში, ლუგანსკის ოლქში 2014 წლის ივნისში დაიღუპნენ. სავჩენკო ამ დრომდე ყველა ბრალდებას უარყოფს. მისი თქმით, ის რუსმა სეპარატისტებმა ჟურნალისტების დაღუპვამდე ტყვედ აიყვანეს და რუსულ მხარეს გადასცეს.