მესის 5 წლის ავღანელი ფანის ოჯახს ემუქრებიან - ოჯახი იძულებული გახდა ავღანეთი დაეტოვებინა

მსოფლიო - 10:52, 04 May, 2016

13021

არგენტინელი ფეხბურთელის, ლიონელ მესის 5 წლის ავღანელი ფანის, მურთაზა აჰმადის ოჯახი იძულებული გახდა, ავღანეთი დაეტოვებინა და საცხოვრებლად პაკისტანში გადასულიყო. ამის შესახებ BBC-სთან ბიჭის მამამ ისაუბრა. მისი თქმით, მას შემდეგ, რაც პატარა მურთაზა ცნობილი გახდა, ოჯახმა მუქარის შემცველი არაერთი შეტყობინება მიიღო. მამაკაცის თქმთ, ვინაიდან მისმა შვილმა მესისგან მაისურები მიიღო, ადგილობრივი კრიმინალები ფიქრობენ, რომ მესიმ მათ ფულიც გაუგზავნა და სწორედ მის გამოძალვას ცდილობენ. მათ ღაზნის პროვინციაში სახლი დატოვეს და პაკისტანის ქალაქ კვეტაში გადასახლდნენ.

ჯერ კიდევ უცნობი ბიჭის ფოტომ ინტერნეტი მაშინ ააფეთქა, როდესაც ის პოლიეთლილენის პარკის მაისურით გამოჩნდა, რომელსაც ზედ ფლომასტერით მესი ეწერა.

პატარა მურთაზას ფოტოს გამოჩენის შემდეგ, რამდენიმე დღის განმავლობაში ინტერსივრცის მომხმარებლები მთელი მსოფლიოდან მას ეძებდნენ, რათა მისთვის მესის ნამდვილი მაისური ეჩუქებინათ. პატარა ბიჭის ფოტომ თავად ფეხბურთელამდეც მიაღწია. მესიმ თვითერზე დაწერა, რომ ბიჭს ეძებდა. ბიჭუნა ავღანეთში იპოვეს.

მურთაზას პოპულარობის შესახებ მისმა ოჯახმა მას შემდეგ შეიტყო, რაც ინტერნეტში გავრცელებულ სურათზე მისმა ბიძამ აზიმ აჰმადმა თავის ძმისშვილი ამოიცნო. მურთაზას მამის თქმით, მას საშუალება არ ჰქონდა შვილისთვის მესის მაისური ეყიდა. ამირომ მურთაზასთვის უფროსმა ძმამ პოლიეთილენის პარკისგან ფეხბურთელის მაისური შექმნა.

"იუნისეფმა" ავღანელ ბიჭუნას, მესის ავტოგრაფიანი მაისური გაუგზავნა.