ბოტანიკური ბაღის მიმდებარედ 29 ჰექტარი მიწის ნაკვეთი „თანაინვესტირების ფონდმა" შეიძინა

ბიზნესი & ეკონომიკა - 19:49, 03 May, 2016

2271

ბოტანიკური ბაღის მიმდებარედ მდებარე 29 ჰექტარი მიწის ნაკვეთი თანაინვესტირების ფონდმა შეიძინა. ამის შესახებ ცნობილი დღეს ფონდის მიერ გამართულ პრესკონფერენციაზე გახდა. როგორც ბრიფინგზე ფონდის წარმომადგენელმა, ირაკლი ქარსელაძემ განაცხადა საქართველოს თანაინვესტირებოს ფონდმა აუქციონში მონაწილეობა შვილობილ კომპანიასთან ერთად მიღო და გამარჯვებულად გამოცხადდა.

ქარსელაძის თქმით პროექტი უმაღლესი კლასის სასტუმროს აშენებასთან ერთად მწვანე საფარის შენარჩუნებას და ახალი ხეების დარგვასაც ითვალისწინებს, ამასთანავე მოეწყობა საირიგაციო სისტემაც.

"შემუშავდება დასკვნები და ყველა პირობა ზედმიწევნით იქნება დაცული. მშენებლობა 20 ათას კვადრატულ მეტრზეა დაშვებული და ასეც მოხდება. ნებისმიერი მშენებლობა განხორციელდება სიღრმეში და არ იქნება აღქმული ქალაქის ტერიტორიიდან. მოეწყობა ველობილიკები, რეკრეაციული ზონა, გოლფის მოედნები, რათა ხალხმა მშვიდ გარემოში დაისვენოს"-აღნიშნა ქარესელაძემ.

შეგახსენებთ თბილისის მერიის ქონების მართვის სააგენტოს მიერ გამოცხადებული აუქციონი დღეს, 17:00 საათზე დასრულდა. აუქციონზე გამოტანილი იყო ოქროყანის ტერიტორიაზე არსებული 29 ჰექტარი მიწის ნაკვეთი. აუქციონის პირობების თანახმად, გასაყიდი ტერიტორიის საწყისი ფასი 6 233 000 ლარს შეადგენდა. აუქციონში მონაწილეობა ერთმა პრეტენდენტმა მიიღო. გაყიდული ქონების ფასმა 6 326 495 ლარი შეადგინა.

აუქციონში გამარჯვებული ვალდებულია სამშენებლო ნებართვის აღებიდან არაუგვიანეს 36 თვის ვადაში, მაგრამ ხელშეკრულების გაფორმებიდან არაუგვიანეს 48 თვის ვადაში, განახორციელოს 80 ნომრიანი სასტუმრო კომპლექსის მშენებლობა, რომლის განაშენიანების ფართი უნდა იყოს არაუმეტეს 20 000 კვ.მ. აუქციონში გამარჯვებულმა უნდა განახორციელოს გადაცემულ მიწის ნაკვეთზე მწვანე ნარგავების მოვლა-პატრონობა, განახლება, ტერიტორიის კეთილმოწყობა, რეკრეაციული სივრცის განვითარება და საირიგაციო სისტემის მოწყობა.