ევროკავშირმა შესაძლოა, თურქეთთან უვიზო მიმოსვლას უახლოეს დღეებში მხარი დაუჭიროს. ამის შესახებ BBC, ანონიმურ წყაროზე დაყრდნობით იტყობინება.

ბიბისის ინფორმაციით, ევროკომისია თურქეთისთვის სავიზო რეჟიმის გაუქმების საკანონმდებლო წინადადებას 4 მაისს წარადგენს.

უვიზო მიმოსვლა ოფიციალურ ანკარასა და ევროკავშირს შორის მარტში მიღწეული შეთანხმების ნაწილია, რომლის მიხედვითაც, თურქეთი საბერძნეთის ტერიტორიაზე გადასულ მიგრანტებს თურქეთში დააბრუნებს და სპეციალურ ბანაკებში მათ ცხოვრებას უზრუნველყოფს.

შეთანხმების მიუხედავად, შენგენის ზონაში უვიზოდ შესვლის უფლების მისაღებად თურქეთი კვლავ ვალდებულია ევროკავშირის კრიტერიუმები დააკმაყოფილოს.

როგორც ბიბისი აღნიშნავს, ევროკავშირი უვიზო მიმოსვლის რეჟიმის მსურველ ქვეყანას სიტყვის თავისუფლების პრინციპების დაცას, სასამართლოს დამოუკიდებლობის უზრუნველყოფას, უმცირესობების უფლებების დაცვასა და ანტიტერორისტული კანონმდებლობის ცვლილებას სთხოვს. სწორედ, ეს მოთხოვნები გააჩნია ევროკავშირს თურქეთთან.

თავის მხრივ, თურქეთის პრემიერმა აჰმეთ დავუთოღლუმ განაცხადა, რომ ანკარა მიგრაციული შეთანხმების შესრულებაზე უარს იტყვის, თუ ევროკავშირი თურქეთის მოქალაქეებისთვის სავიზო რეჟიმს ივნისში არ გააუქმებს.