სურსათის ეროვნულმა სააგენტომ ვადაგასული პროდუქცია ამოიღო

საზოგადოება - 11:51, 13 Apr, 2013

515

ამჯერად, თბილისის საქალაქო სამმართველოს სპეციალისტებმა ლილოს ტერიტორიაზე მდებარე სუპერმარკეტებიდან დიდი რაოდენობით სხვადასხვა დასახელების სარეალიზაციოდ გამზადებული ვადაგასული სურსათი ამოიღეს.

სააგენტოს ცნობით, ტკბილეული, საკონდიტრო ნაწარმი, ძეხვეული, სხვადასხვა დასახელების კონსერვი და რძის პროდუქტები დაილუქა და აიკრძალა მისი შემდგომი რეალიზება. მათივე ინფორმაციით, მოქმედი კანონმდებლობით, ვადაგასული სურსათი ექვემდებარება განადგურებას.
მიმდინარე წელს სურსათის ეროვნულმა სააგენტომ სახელმწიფო კონტროლის-მონიტორინგის განხორციელებისას, ვეტერინარული მოწმობა - ფორმა N2-ის გარეშე ხორცის რეალიზაციის გამო 53 ბიზნესოპერატორი დააჯარიმა. ასევე გაანადგურდა დიდი რაოდენობით დაავადებული ცხენის ხორცი.

სურსათის ეროვნული სააგენტოს ცნობით, ვადაგასული სურსათი ამოღებულია 36 სავაჭრო ობიექტიდან. გეგმურად შემოწმდა 180 ობიექტი, არაგეგმურად - 62, დაიხურა ორი საწარმო და დაჯარიმდა 1000-1000 ლარით. გადამოწმდა 232 ბიზნესოპერატორი და ნაკისრი ვალდებულებების შეუსრულებლობის გამო, დაჯარიმდა 88 მათგანი 400 ლარით. განმეორებითი გადამოწმებისას დაჯარიმდა სამი ბიზნესოპერატორი 1200 ლარის ოდენობით.