საქართველოს ეროვნული ბანკის პრეზიდენტის კობა გვენეტაძის თქმით ონლაინ სესხების საკითხი უფრო მეტ ყურადღებას მოითხოვს. აღნიშნული განცხადება გვენეტაძემ დღეს გამართულ ბრიფინგზე გააკეთა, მისი თქმით დღეისთვის ონლაინ სესხები ეროვნული ბანკის რეგულირებაში არ ხვდება, აღნიშნული სესხების ბანკის რეგულირების ქვეშ მოსაქცევად კი საკანონმდებლო ცვლილებაა საჭირო. როგორც გვენეტაძემ აღნიშნა ეროვნული ბანკის ყველა მიდგომა მომხმარებელთა უფლებათა დაცვისკენ იქნება მიმართული.

"ეს არის ის საკითხი, რომელსაც უფრო მეტი ყურადღება უნდა დაეთმოს. დღეისთვის ონლაინ სესხები ეროვნული ბანკის რეგულირების სფეროში არ ხვდება, სახელმწიფომ უნდა გადაწყვიტოს თუ ვის დაევალება ზოგადად ამ ბაზრის რეგულირება. პრაქტიკა სხვადასხვა ქვეყანაში განსხვავებულია. ჩვენ ამ საკითხებს მომხმარებელთა დაცვის კუთხიდან ვუყურებთ. ზოგადად ვიტყვი, რომ სესხის აღებამ არ უნდა გააუარესოს მსესხებლის ეკონომიკური მდგომარეობა და აქეთკენ უნდა იყოს მიმართული ის ღონისძიება, რომელიც გატარებული იქნება ამ მიმართულებით. ამავე დროს, მსესხებელს უნდა ჰქონდეს შესაძლებლობა, შეაფასოს ყველა ის რისკი და ხარჯი, რომელიც დაკავშირებული იქნება ამ სესხის მიღებათან. ბალტიის ქვეყნებს აქვთ შედარებით დიდი ხნის გამოცდილება ამ საკითხთან დაკავშირებით და ჩვენ ამ გამოცდილებას ვსწავლობთ. ვფიქრობ, რომ ეს საკითხი მისახედია და მას შემდეგ, რაც გადაწყდება, თუ ვინ გააკეთებს ამ საკითხის რეგულირებას, შესაბამისად მოხდება იმ ღონისძებათა შემუშავება, რაც მომხმარებელთა დაცვის მინზით შეეცდება, რომ სავალალო შემთხვევები გამოირიცხოს. ეს ქვეყნის ფინანსურ სტაბილურობაზეც დადებითად აისახება." - განაცხადა კობა გვენეტაძემ.