"ქურთების მუშათა პარტია" თურქეთის წინააღმდეგ საბრძოლო მოქმედებებს გააძლიერებს"

"ქურთების მუშათა პარტია" თურქეთის წინააღმდეგ საბრძოლო მოქმედებებს გააძლიერებს" - ქურთების ლიდერი

მსოფლიო - 12:16, 25 Apr, 2016

2992

"ქურთისტანის მუშათა პარტიის“ ლიდერის, ჯემილ ბაიკის განცხადებით, მისი მებრძოლები მზად არიან თურქეთის წინააღმდეგ სამხედრო ოპერაციები გააძლიერონ. ამის შესახებ ბაიკმა „ბიბისთან“ ინტერვიუში ისაუბრა.

„ქურთები საკუთარ თავს დაიცავენ ბოლომდე. თუკი თურქეთი თავის მიდგომას არ შეცვლის, ქურთისტანის მუშათა პარტია“ სამხედრო ოპერაციებს გააფართოებს“ - განაცხადა მან. ქურთების ლიდერმა თურქეთის პრეზიდენტს კონფლიქტის ესკალაციაშიც დასდო ბრალი.

„მას (ერდოღანი) სურს, რომ ქურთები დანებდნენ. თუკი არ დანებდებიან, მას ყველა ქურთის დახოსცვა სურს. ამაზე ღიად ლაპარაკობს, ის ამას არ მალავს“ - განაცხადა ბაიკმა.

ამავდროულად, ქურთების ლიდერმა აღნიშნა, „ქურთისტანის მუშათა პარტია“ თურქეთისგან გამოყოფისკენ არ ისწრაფვის. მისი თქმით, ანკარის მხრიდან სურვილის შემთხვევაში, მოლაპარაკებებისთვისაც მზად არიან.

თურქეთის პრეზიდენტის, რეჯეპ ტაიპ ერდოღანის მრჩევლის, ილნურ ჩევიკის თქმით, კი თურქეთის მთავრობა ამ ეტაპზე მოლაპარაკებებს არ აპირებს.

"მათ თურქეთის ტერიტორიაზე საკუთარი სახელმწიფოს შექმნა სურთ, ეს ნათელია" - განაცხადა ჩევიკმა.

“ქურთისტანის მუშათა პარტიასა” და თურქეთის ხელისუფლებას შორის სამშვიდობო შეთანხმება გასული წლის ივლისში დაირღვა. მხარეებს შორის შეტაკებებს 340-ზე მეტი თურქი სამხედრო და 500 ქურთი ემსხვერპლა.