,,ასეთი ცვალებადია ადამიანი - ის ვინც ადიდებდა უფალს, რამდენიმე დღეში ყვიროდა ,,ჯვარს აცვი“

,,ასეთი ცვალებადია ადამიანი - ის ვინც ადიდებდა უფალს, რამდენიმე დღეში ყვიროდა ,,ჯვარს აცვი“ - ილია მეორე

რელიგია - 15:28, 24 Apr, 2016

6953

ბზობის დღესასწაული მიულოცა მრევლს სრულიად საქართველოს კათალიკოს-პატრიარქმა ილია მეორემ და ამ დღის მნიშვნელობაზე იქადაგა. უწმინდესმა მაცხოვრის იერუსალიმში დიდებით შესვლის სახარებისეული ეპიზოდზე გაამახვილა ყურადღება და მრევლს შეახსენა -ის ხალხი, რომელიც უფალს ადიდებდა და ოსნას უგალობდა, იგივე ხალხი რამდენიმე დღეში ყვიროდა ,,ჯვარს აცვი იგი...“. უწმინდესის თქმით, დროის ცვლილებასთან ერთად ადამიანიც იცვლება და მასში სისუსტე იჩენს თავს. პატრიარქმა აღნიშნა, რომ ახლოვდება აღდგომის ბრწყინვალე დღესასწაული და იგი შესთხოვს უფალს, რომ თითოეული ადამიანი ღირსეულად მოემზადოს ამ დიდებული დღესასწაულისთვის.

„ადამიანის ცხოვრება საოცრად განსხვავებულია. დრონი იცვლებიან და ჩვენც მასთან ერთად ვიცვლებით. სიხარული და მწუხარება თითქოს ტყუპი ძმებივით დადიან ერთად. როგორც ერთი ბრძენი ადამიანი ამბობდა, დიდებიდან მწუხარებამდე ერთი ნაბიჯია. დღეს ვდღესასწაულობთ უფლისა ჩვენისა იესო ქრისტეს ზეიმით შესვლას იერუსალიმში, სადაც მას ხალხი უგებდა ტანსაცმელს და ხის ტოტებს. უფალი ტიროდა, იმიტომ, რომ ხედავდა იმ ხალხის სისუსტეს. იგივე ხალხი, რომელიც ადიდებდა უფალს და უგალობდა ოსანას, რამდენიმე დღეში იყვირებდა „ჯვარს აცვი იგი“. ასეთი ცვალებადია ადამიანი და ჩვენ შევთხოვთ უფალს გაგვაძლიეროს ჩვენს სიკეთეში, გაგვაძლიეროს ჭეშმარიტ რწმენაში, მართლმადიდებლობაში, ასევე გააძლიეროს ჩვენში სიყვარული, მიმტევებლობა და ცოდვათა ჩვენთა განცდა“, - განაცხადა ილია მეორემ.