პანამის პოლიციის ორგანიზებულ დანაშაულთან ბრძოლის განყოფილების თანამშრომლებმა პარასკევს, 22 აპრილს, Mossack Fonseca-ს ოფისში უტილიზებული დოკუმენტებით სავსე 10 ტომარა იპოვეს. ამის შესახებ ინფორმაციას reuters ავრცელებს.

"ჩვენ ეს ტომრები ამოვიღეთ, როგორც სამხილი," - აცხადებს პოლიციის წარმომადგენელი ხავიე კარაბალიო.

განადგურებულ დოკუმენტებს დეტალური ექსპერტიზა ჩაუტარდებათ და თუ აღმოჩნდება, რომ ისინი რაიმე სახით უკავშირდება "პანამის სკანდალს", Mossack Fonseca-ს წინააღმდეგ ახალი სისხლის სამართლის საქმე აღიძვრება, დანაშაულის დაფარვის მუხლით.

თავად კომპანიაში აცხადებენ, რომ ეს ჩვეულებრივი პროცედურაა და დოკუმენტების ასლები კომპანიაში ინახება.

შეგახსენებთ, საერთაშორისო საგამომძიებლო ჟურნალისტურმა კონსორციუმმა (ICIJ) სკანდალური დოკუმენტები გამოაქვეყნა.

ICIJ-ს ხელში აღმოჩნდა პანამის იურიდიული კომპანიის "Mossack Fonseca-ს" საქმიანობის შესახებ დოკუმენტაცია. როგორც კონსორციუმის წარმომადგენლები აცხადებენ, ნახსენები კომპანია თავის კლიენტებს ეხმარებოდა გადასახადების დაფარვასა და ფულის გათეთრების საკითხებში. ფირმის დოკუმენტებში ნახსენებია 72 ქვეყნის ყოფილი და ამჟამინდელი მეთაურები, ასევე ცნობილი ადამიანები. დოკუმენტებში ნახსენებია 4 ფირმა, რომელსაც სხვადასხვა სახით კავშირი ჰქონდა რუსეთთან.

"პანამის დოკუმენტების" სკანდალის გამო თანამდებობა დატოვა ისლანდიის პრემიერმა.