ამის შესახებ "ნიუპოსტს" ერთ-ერთმა სოციალურად დაუცველმა, გიორგი მარჯანიძემ უთხრა. მისი თქმით, კლინიკა საპატრიარქოს წარმომადგენელთა თხოვნის შემდეგ დატოვეს. კლინიკაზე საქართველოს საპატრიარქო ზრუნავს.

სოციალურად დაუცველებმა კლინიკა დაახლოებით ღამის 01.00 საათზე დაიკავეს. მათ იქ ბიძინა ივანიშვილის ბიზნესცენტრიდან გადაინაცვლეს, სადაც დაახლოებით 20 დღეა, აქციას მართავენ, სოციალურად დაუცველები საცხოვრებელი ფართით დაკმაყოფილებაში დახმარებას პრემიერმინისტრს სთხოვდნენ. რამდენიმე დღის წინ მათ შიმშილობაც გამოაცხადეს, თუმცა აქციის მონაწილეებს არც პრემიერი, არც მისი წარმომადგენელი არ შეხვედრიან.

გიორგი მარჯანიძის განცხადებით, კლინიკაში შესვლიდან დაახლოებით ათ წუთში შემთხვევის ადგილზე ათამდე საპატრულო პოლიციის ეკიპაჟი მივიდა, თუმცა მათ სოციალურად დაუცველთა გამოდევნა არ დაუწყიათ.

მოგვიანებით მოლაპარაკება შედგა საპატრიარქოს წარმომადგენელთა და აქციის მონაწილეთა შორის, რის შემდეგაც პოლიცილებმა ტერიტორია დატოვეს.

გიორგი მარჯანიძის თქმით, შეთანხმდნენ, რომ დღეს შეხვედრა საპატრიარქოში გაიმართება. მისივე თქმით, საპატრიარქოს წარმომადგენლისგან კონკრეტული დაპირება მიიღეს, რომ მათი პრობლემები მოგვარდება.