FBI-ის iPhone-ის პროგრამული უზრუნველყოფის გატეხვა მილიონ სამასი ათას დოლარზე მეტი დაუჯდა. უწყების ხელმძღვანელმა პრესკონფერენციაზე განაცხადა, რომ სან-ბერნანდინოს თავდამსხმელის ტელეფონიდან პირადი ინფორმაციის მოძიებაზე ბიურომ იმაზე მეტი დახარჯა, ვიდრე ის პენსიაზე გასვლამდე 7 წლის განმავლობაში გამოუმუშავებს.

FBI-ის სან-ბერნანდინოს ტერორისტის, საიდ ფარუქის ტელეფონიდან სასურველი მონაცმების მიღება სურდა. მარტის დასაწყისში გამოძიებამ Apple-ს თხოვნით მიმართა , რომ მის ინჟინრებს პაროლის შეყვანის ლიმიტი მოეხსნათ და ისეთი სისტემა შეემუშავებინათ, რომელიც ავტომატურ რეჟიმში აკრიფავს ყველა შესაძლო კოდს. თუმცა, კომპანიისგან უარი მიიღო, რადგან მისი განცხადებით, პეცსამსახურების მოთხოვნა კომპანიის მომხმარებელთა უფლებებს არღვევს. კომპანიამ აშშ-ის ფედერალურ ბიუროს სასამართლოც მოუგო. ნიუ-იორკის სასამართლომ FBI-ისა და Apple-ს შორის არსებული დავა, ამერიკული კომპანიის სასარგებლოდ გადაწყვიტა.

სასამართლო დავა 7 აპრილს უნდა გაგრძელებულიყო, თუმცა აშშ-ის იუსტიციის სამინისტროში განაცხადეს, ტელეფონიდან მონაცემების მიღება “მესამე მხარის” დახმარებით შეძლეს. ამიტომ Apple-ის წინააღმდეგ სასამართლოში შეტანილი სარჩელი უკან გააქვთ.

როგორც კომპანია Apple-ში აცხადებენ, მათთვის უცნობია, რა მეთოდით შეძლეს გამომძიებლებმა ტელეფონიდან ინფორმაციის მიღება. კომპანიის განცხადებით, პროგრამისტები მონაცემების დაცვის გასაძლიერებლად მუშაობას გააგრძელებენ.

სან-ბერნანდინოს ტერაქტს 2011 წლის 11 სექტემბრის შემდეგ ყველაზე დიდი ტერაქტი უწოდეს. საიდ ფარუკმა და მისმა მეუღლემ ტაშფინ მალიკმა2015 წლის 3 დეკემბერს, კალიფორნიის ქალაქ სან-ბერნარდინოში 14 მშვიდობიანი მოქალაქე მოკლეს და ოცზე მეტი ადამიანი დაჭრეს.