შეტყობინების თანახმად, რომელიც სოციალურ ქსელ "ფეისბუქშიც" გავრცელდა, მკვლელობა ათენის ერთ-ერთ უბანში კალითეაში, საცხოვრებელი კორპუსის ერთ-ერთ ბინაში მოხდა. ვერსიის მიხედვით, ფსიქიკაშერყეული მოხუცი გუშინ ღამით მძინარე მომვლელს მიეპარა და თავში ტაფის ჩარტყმით სასიკვდილო დაზიანება მიაყენა.

მკვლელობის შესახებ შემთხვევით შეიტყო იმავე კორპუსში სამუშაოდ მყოფმა, ასევე ქართველმა ქალმა, რომელმაც მომხდარის შესახებ სხვა მომვლელებსაც შეატყობინა, რადგან აღმოჩნდა, რომ ბინიდან, საიდანაც მოკლულის ცხედარი გამოასვენეს, მოხუცი გაქცეულია.

არსად ჩანს გარდაცვლილის საბუთები და მობილური ტელეფონიც, რის გამოც მოკლული ქალბატონის ვინაობა დაუდგენელია. ცნობილია მხოლოდ მისი სახელი - მზევინარი და შესაძლო წარმოშობის ადგილი: ზესტაფონის რაიონის სოფელი კვალითი, სადაც ის, სავარაუდოდ, აფთიაქში მუშაობდა.

ათენში მცხოვრებმა ქართველებმა "ნიუპოსტში" გაგზავნილ წერილთან ერთად, განცხადება სოციალურ ქსელებშიც გაავრცელეს და გარდაცვლილის ოჯახისთვის ხმის მიწოდებაში დახმარება ითხოვეს.

მათი თქმით, თუკი გარდაცვლილს ერთი კვირის განმავლობაში არავინ მოიკითხავს და სამშობლოში არ გადაასვენებს, ადგილობრივი ხელისუფლების შესაბამისი სამსახური ცხედარს კრემაციას ჩაუტარებს.

გამოხმაურების შემთხვევაში "ნიუპოსტი" გამოთქვამს მზადყოფნას ინფორმაციის პირველწყაროსთან დაინტერესებული პირების დასაკავშირებლად.

ლაშა ბერულავა