უკრაინის უმაღლესმა რადამ, უკვე ყოფილი პრემიერის, არსენი იაცენიუკის გადადგომის შესახებ განცხადება დააკმაყოფილა და პრემიერ-მინისტრის თანამდებობაზე ვლადიმერ გროისმანის კანდიდატურა დაამტკიცა. გროისმანის კანდიდატურას 257-მა დეპუტატმა დაუჭირა მხარი, 50 კი მის წინააღმდეგ გამოვიდა

დამტკიცებულია ახალ მთავრობაც, რომლის შემადგენლობაშიც ექვსი ვიცე- პრემიერი იქნება. პირველი ვიცეპრემიერის თანამდებობა რადაში პრეზიდენტის წარმომადგენელმა სტეპან კუბივმა დაიკავა.

მინისტრის პორტფელები შეინარჩუნეს შინაგან საქმეთა მინისტრმა არსენი ავაკოვმა, იუსტიციის მინისტრმა პაველ პეტრენკომ, ასევე თავდაცვის, საგარეო საქმეთა, საინფორმაციო პოლიტიკის , რეგიონული განვითარების და ახალგაზრდობისა და სპორტის მინისტრებმა.

რადას სპიკერად არჩეულ იქნა ანდრეი პარუბი.

ამ დრომდე უცნობია ეკონომიკის მინისტრის კანდიდატურა. ასევე არ წარუდგენიათ ჯანდაცვის მინისტრის კანდიდატურაც, ამიტომ უწყების ხელმძღვანლის მოვალეობის შემსრულებლად ჯერჯერობით კვლავ ალექსანდრე კვიტაშვილი რჩება.