გეძლევათ ლოცვა-კურთხევა, ადამიანებს უთხრათ სასიხარულო ამბავი

გეძლევათ ლოცვა-კურთხევა, ადამიანებს უთხრათ სასიხარულო ამბავი - პატრიარქი

რელიგია - 14:45, 07 Apr, 2016

19418

ხარების დღესასწაულთან დაკავშირებით საზეიმო წირვა სრულიად საქართველოს კათოლიკოს-პატრიარქმა სვეტიცხოვლის საკათედრო ტაძარში აღავლინა. უწმინდესის თქმით, დღევანდელ დღეს ყოველი ადამიანი სიხარულის მახარებელი უნდა იყოს.

,,მთელი მართლმადიდებლობა დღეს ღვთისმშობლის ხარების დღესასწაულს ზეიმობს და ეს დღე განსაკუთრებული დღეა. როგორც ამბობენ ჩვენი წინაპრები, იმდენად დიდია ხარების დღესასწაული, რომ ამ დღეს ჩიტი ბუდესაც არ იკეთებს და ადიდებს უფალს. ჩვენ ვადიდებთ უფალს და მადლობას ვწირავთ მას, მოგვმადლოს წყალობა, მშვიდობა, სიხარული და სიყვარული. დღევანდელი დღე ჩვენ შთაგვაგონებს იმას, რომ ყოველი ადამიანი უნდა იყოს მახარებელი. აი, გეძლევათ თქვენ ლოცვა-კურთხევა, რომ ადამიანებს უთხრათ სასიხარულო ამბავი, არა სამწუხარო და არა ნეგატიური, როგორც ჩვენი ტელევიზიები სულ ნეგატიურს გადმოსცემენ და ეს ქმნის სიმძიმეს, სტრესებს, თითქმის არ გადის დღე, რომ არ მოვიდნენ ჩვენთან და არ თქვან, რომ ამა თუ იმ ადამიანმა თავი მოიკლა. სიხარული უნდა ვახაროთ ადამიანებს, ჩავიხედოთ ადამიანის გულში“, - ბრძანა უწმინდესმა.

ილია მეორემ ხარების დღესასწაული აფხაზებს, ოსებს და რუსი ერის წარმომადგენლებს მიულოცა. „თქვენ ისეთივე ჩვენი სულიერი შვილები ხართ, როგორც ქართველები, ამიტომ ჩვენ უნდა ვიყოთ ერთად, ამოვუდგეთ ერთმანეთს მხარში“, - განაცხადაპატრიარქმა.