ცეცხლის დაუყოვნებლივი შეწყვეტისა და მოლაპარაკებების გაგრძელებისაკენ მოუწოდებენ სომხეთსა და აზერბაიჯანს შეერთებული შტატებისა და რუსეთის საგარეო უწყებების ხელმძღვანელები.

ლავროვისა და კერის სატელეფონო საუბრის დეტალებზე ინფორმაციას სახელმწიფო დეპარტამენტი ავრცელებს. მოსკოვი და ვაშინგტონი კონფლიქტის მონაწილე ორივე მხარეს მოუწოდებს თავი შეიკავონ ვითარების შემდგომი დაძაბვისაგან და დაუბრუნდნენ მოლაპარაკებებს მინსკის ჯგუფის ფორმატში.

„სახელმწიფო მდივანმა და რუსეთის საგარეო საქმეთა მინისტრმა ტელეფონით სხვადასხვა საკითხებზე ისაუბრეს, მათ შორის იყო მთიანი ყარაბაღის კონფლიქტის ხაზზე დაპირისპირების დაუყოვნებლივ შეწყვეტაც. მათ მოუწოდეს აზრებაიჯანსა და სომხეთს დაუყოვნებლივ დაუბრუნდნენ მოლაპარაკებებს, რომლებიც ეუთო-ს ხელშეწყობით იმართება. უკიდურესად ვგმობთ ამ შაბათ-კვირას მომხდარს, ორივე მხრიდან არის მსხვერპლი მშვიდობიან მოსახლეობაში, მოვუწოდებთ მხარეებს, რომ დაუყოვნებლივ შეწყვიტონ ძალის გამოყენება და თავიდან აიცილონ ვითარების შემდგომი ესკალაცია“, - განაცხადა აშშ-ს სახელმწიფო დეპარტამენტის პრეს მდივანმა, მარკ ტონერმა.