როგორც მინისტრმა, გურამ ოდიშარიამ განაცხადა, კულტურის სამინისტრომ სპეციალური მიმართვაც შეიმუშავა, რომელიც საგარეო უწყებასთან შეთანხმებით თურქულ მხარეს გადაეგზავნება.

"იშხანზე მიმიდინარე სამუშაოები უნდა შეჩერდეს. უახლოეს მომავალში, კულტურის სამინისტროდან გაემგზავრება დელეგაცია, რომლის შემადგენლობაშიც იქნებიან როგორც სამინისტროს, ისე კულტურული მემკვიდრეობის დაცვის ეროვნული სააგენტოს წარმომადგენლები და ჟურნალისტები. დავათვალიერებთ ჯერ იშხანს და შემდეგ ოშკსაც, რომელიც შორს არ მდებარეობს", - განაცხადა გურამ ოდიშარიამ.

იშხანზე მიმდინარე დასუფთავების სამუშაოებს საგანგაშოდ მიიჩნევს კულტურული მემკვიდრეობი დაცვის ეროვნული სააგენტოს ხელმძღვანელი.

მერაბ ბოჭოიძე აცხადებს, რომ გაწმენდით პროცესს არქეოლოგი არ ესწრება, რაც მეთოდოლოგიური შეცდომების დაშვებისა და ისტორიული კვალის დაკარგვის საფრთხეს ქმნის.

კულტურის მინისტრი ამ თემაზე სასაუბროდ თურქეთის ელჩთან შეხვედრასაც გეგმავს.