საყვარელიძე უკრაინის პრეზიდენტს შეხვდა - პოროშენკო მისი თანამდებობაზე აღდგენის საკითხს განიხილავს

მსოფლიო - 10:29, 31 Mar, 2016

4040

უკრაინის გენერალური პროკურორის ყოფილი მოადგილე დავით საყვარელიძე პრეზიდენტ პოროშენკოს შეხვდა.

როგორც სააგენტო Новое Время-სთან ინტერვიუში საყვარელიძემ განაცხადა, შეხვედრაზე საუბარი მისთანამდებობაზე დაბრუნებას შეეხო.

სტატიის თანახმად პოროშენკოს თქმით საყვარელიძის გათავისუფლება მასთან შეთანხმებული არ ყოფილა . გარდა ამისა, პრეზიდენტმა პირობა დადო, რომ ახალ გენერალურ პროკურორთან საყვარელიძის თანამდებობაზე აღდგენის საკითხს განიხილავს.

შეგახსენებთ, ორი დღის წინ გავრცელებული ცნობით, დავით საყვარელიძე უკრაინის გენერალური პროკურორის მოადგილის თანამდებობიდან გადააყენეს. ასევე საყვარელიძეს დააკისრეს დისციპლინური პასუხისმგებლობა „პროკურორის ეთიკის უხეში დარღვევისთვის“.

გათავისუფლების მიზეზად რეორგანიზაცია და უკრაინის რადის დეპუტატთა კოლექტიური წერილი სახელდება.

განცხადებაში აღნიშნულია, რომ გენპროკურატურაში არაერთი წერილი შევიდა საყვარელიძის მიერ ორი თანამდებობის შეუთავსებლობასთან დაკავშირებით, რაც გენერალური პროკურორის მოადგილის და ოდესის პროკურორის თანამდებობის ერთდროულად დაკავებას გულისხმობს.

გავრცელდა ინფორმაცია, რომ დავით საყვარელიძე პროკურატურაში დაკითხვაზეც დაიბარეს.