ნადეჟდა სავჩენკოს ჯანმრთელობის მდგომარეობა გაუარესდა

ნადეჟდა სავჩენკოს ჯანმრთელობის მდგომარეობა გაუარესდა - ის დღეში 500 გრამს კარგავს

მსოფლიო - 14:53, 29 Mar, 2016

2851

ნადეჟდა სავჩენკოს ჯანმრთელობის მდგომარეობა გაუარესდა. მისმა ორგანიზმმა წყლის მიღება შეწყვიტა. ამის შესახებ სავჩენკოს ადვოკატმა, ნიკოლაი პოლოზოვმა განაცხადა.

მისი თქმით, განაჩენის გამოცხადების შედგემ, სავჩენკომ მხოლოდ წყლის მიღება დაიწყო, ყოველგვარი მინერალებისა და დანამატების გარეშე, ახლა კი წყლის მიღებისას მას ღებინება დაეწყო.

„მდგომარეობის გაუარესების შემდეგ, მას მინერალური წყლის მიღება აიძულეს, რაც ჯანმრთელობის მდგომარეობის დასტაბილურებას შეუწყობს ხელს. თუმცა, სავჩენკო დღეში 400-500 გრამს კარგავს. მისი წონა ამჟამად 65 კგ-ს შეადგენს“ - განაცხადა ადვოკატმა.

შეგახსენებთ, რუსეთის ქალაქ დონეცკის სასამართლომ ნადეჟდა სავჩენკო, რუსი ჟურნალისტების მკვლელობაში დამნაშავედ ცნო და მას 22 წლით თავისუფლების აღკვეთა მიუსაჯა.

სავჩენკოს ბრალად ედება იმ რუსი ჟურნალისტების მკვლელობა, რომლებიც უკრაინაში, ლუგანსკის ოლქში 2014 წლის ივნისში დაიღუპნენ. სავჩენკო ამ დრომდე ყველა ბრალდებას უარყოფს. მისი თქმით, ის რუსმა სეპარატისტებმა ჟურნალისტების დაღუპვამდე ტყვედ აიყვანეს და რუსულ მხარეს გადასცეს.

ცნობილია პეტრო პოროშენკოს პოზიციაც : ის მზადაა ნადეჟდა სავჩენკო ორ რუს სამხედრო მოსამსახურეზე, ალექსანდროვსა და ეროფეევზე გაცვალოს.