ათონის მთაზე მოღვაწე ბერი გედეონის უცნობი ისტორია

რელიგია - 17:53, 24 Mar, 2016

4297

მამა გედეონი ათონის მთაზე 1832 წელს ჩავიდა. იმ წლებში სავანეში მოღვაწე მამებს თურქები და ზღვაზე მოთარეშე ავაზაკები ავიწროებდნენ. ერთხელ, დიდ პარასკევს სავანეს ავაზაკები შემოესივნენ. მათ იცოდნენ ღვთისმსახურების განრიგი. ზარი ჟამნობის დროს დარეკეს და უნდოდათ ამგვარად შეეკრიბათ მამები. ბერებმა კი არაფერი უწყოდნენ და სენაკიდან გამოვიდნენ. ავაზაკებმა სამი მათგანი შეიპყრეს, მათ შორის იყო მამა გედეონი. ავაზაკები ფულს სთხოვდნენ და აწამებდნენ, ბერებს კი არაფერი ებადათ. მამა გედეონს ხელებში კეტებს ურტყავდნენ, მტევნებს უბურღავდნენ, მაგრამ მას საყვედურის ერთი სიტყვაც კი არ დასცდენია.

ერთხელ, მამა გედეონთან დამწუხრებული ბერი მივიდა და გაუმხილა, რომ მსახურებაზე ვერაფერს იგებს. „ნუ დამწუხრდები თუკი არ გესმის, მაინც უსმინე ლოცვას . შეხედე ხომალდს, რომელიც ზღვაში მიცურავს. მასზე მგზავრობენ ბერძნებიც, რუსებიც, მოლოველებიც და არაბებიც. მათ ერთმანეთის არ ესმით, მაგრამ ერთ გემზე არიან, ერთმანეთის გვერდით სხედან და ხომალდი ყველა მათგანს ნავსაყუდელში მიიყვანს. ასეა ეკლესიაც: ვინც უნდა იყო აქ, გესმის თუ არა ლოცვა, ყველას მიიყვანს ცათა სასუფეველში. სადაც არ უნდა წავიდეთ, განსაცდელი ყველგან შეგვხვდება. ცასა და დედამიწას შორის ყველგან განსაცდელია . რაოდენ სათნოებებით არ უნდა ვიყოთ შემკული ცოდვებს მაინც ჩავდივართ, ხოლო ქრისტეს არავითარი ცოდვა არ ჰქონდა და ჯვარს აცვეს „ – ანუგეშა მამა გედეონმა .