ბელგიის პოლიცია ბრიუსელის ტერაქტების სავარაუდო ორგანიზატორს, 31 წლის მუჰამედ აბრინის ეძებს

მსოფლიო - 12:04, 24 Mar, 2016

1615

ბელგიის პოლიცია ბრიუსელის ტერაქტების სავარაუდო ორგანიზატორს, 31 წლის მუჰამედ აბრინის ეძებს.

გამოძიების ინფორმაციით, მაროკოელი წარმოშობის, ბელგიის მოქალაქე მუჰამედ აბრინი პარიზის ტერაქტების მთავარი ეჭვმიტანილის, სალაჰ აბდესლამის ბავშვობის მეგობარია. ისინი ბრიუსელში, მალენბეკის რაიონში კარის მეზობლები იყვნენ. პროკურატურის ვარაუდით, აბრინი 13 ნოემბრის პარიზის თავდასხმების ერთ-ერთი ორგანიზატორიცაა.

როგორც ბელგიის პროკურატურა იტყობინება, 2015 წლის 10-11 ნოემბერს აბრინი, პარიზის ტერაქტების მთავარ ფიგურანტებთან - ძმებ სალაჰ და იბრაჰიმ აბდესლამებთან ერთად პარიზში ჩავიდა, სადაც 13 ნოემბრის ტერაქტის მონაწილეებისთვის ბინა იქირავა, თუმცა ჯერჯერობით უცნობია, მონაწილეობდა თუ არა ის უშუალოდ ტერაქტებში.

მუჰამედ აბრინის დაკავების ორდერი პოლიცი ამ ჯერ კიდევ ოთხი თვის წინ გასცა. მას ეძებდნენ, როგოც “საშიში და სავარაუდოდ შეიარაღებულ” პირს.

გამოძიების ცნობით, მუჰამედის უმცროსი ძმა, 20 წლის სულეიმანი, 2014 წელს სირიაში ბრძოლის დროს დაიღუპა. როგორც გაირკვა, ის პარიზის თავდასხმების ერთ-ერთი მთავარ ორგანიზატორ აბდელჰამიდ აბაუდისთან ერთად იბრძოდა. აბაუდი 18 ნოემბერს, სპცოპერაციის შედეგად მოკლეს.