ტერორისტების მთავარ სამიზნეს ბელგიის ბირთვული სისტემა წარმოადგენდა

მსოფლიო - 11:51, 24 Mar, 2016

3360

ბელგიური მედიის ინფორმაციით ტერორისტების მთავარ სამიზნეს ბელგიის ბირთვული სისტემა წარმოადგენდა. თუმცა ხელისუფლების მიერ გატარებულმა ღონისძიებებმა ისინი იძულებული გახადა უფრო „მარტივი“ სამიზნეები, აეროპორტი და მეტრო აერჩიათ. გამოძიების შედეგად დადგინდა, რომ გარკვეული დროის წინ ბელგიის ბირთვული განვითარებისა და კვლევების დირექტორის სახლთან არსებულმა კამერებმა ამ ტერიტორიაზე იბრაჰიმ და ხალიდ ელ ბაკრაუიები დააფიქსირეს, ისინი ტერორისტები ძმები არიან, რომლებაც 22 მარტს ბრიუსელის აეროპორტსა და მეტროში ტერაქტები განახორციელეს.

ამასთანავე დადგინდა, რომ ბელგიის ბირთვულ კომპანიაში გარკვეული პერიოდი ტექნიკოსად მუშაობდა ბელგიელი ილიას ბუგალაბი , რომელსაც ნაცნობობა აკავშირებდა აბდელჰამიდ აბაუდთან და სხვა ჯიჰადისტებთან, ბუგალაბი 2014 წლის მარტში სირიაში დაიღუპა.

ჯერჯერობით, დამატებითი ინფორმაცია არ ვრცელდება იმის შესახებ თუ რამდენად რეალური იყო ბირთვულ სისტემაზე თავდასხმა, არსებობს ინფორმაცია, რომ ჯიჰადისტები აღნიშნულ სისტემის თანამშრომლებს იბირებდნენ. ერთი ვერსიით მათი გადაბირება ურანის მოპარვის მიზნით ხდებოდა, მეორე ვერსიით კი ტერორისტების სამიზნე ბირთვული სადგურების დაზიანება იყო.

ამ ინფორმაციის გამჟღავნების შემდეგ თებერვლის თვეში ბელგიის ბირთვულ სადგურებზე უსაფრთხოების ზომები განსაკუთრებულად გაძლიერდა, შესაძლოა სწორედ ეს გახდა სამიზნის შეცვლის მიზეზიც.