მირიან წიკლაური: მედიკამენტებზე ფასების კლება ფარმაცევტულ ბაზარზე ახალი მოთამაშის, „ჰუმანითი ჯოჯიას“ გამოჩენას მოჰყვა

ბიზნესი & ეკონომიკა - 15:32, 10 Mar, 2016

1482

მედიკამენტების ფასი ფარმაცევტულ ბაზარზე იკლებს.ინფორმაციას ახალგაზრდა ფინანსისტთა და ბიზნესმენთა ასოციაცია ავრცელებს. მათი კვლევა „ფანასკერტელის ინდექსზე“ მუშაობის იმ შედეგებს ეფუძნება, რომელიც ფარმაცევტულ ბაზარზე მედიკამენტების ფასების მონიტორინგს ახდენს. 200 დასახელების ყველაზე მოთხოვნადი მედიკამენტის ჩამონათვალიდან 32 დასახელების წამალზე ფასები შემცირდა, ხოლო 23-ზე გაიზარდა.

ფარმაცევტულ ბაზარზე პრეპარატების ფასებსა და იმ შესაძლო მიზეზებზე, რამაც ფასების კლება გამოიწვია, გვესაუბრება პარლამენტის წევრი, ჯანმრთელობის დაცვისა და სოციალურ საკითხთა კომიტეტის თავმჯდომარის პირველი მოადგილე მირიან წიკლაური:

აფბას-ს მიერ ჩატარებული კვლევის თანახმად, მედიკამენტების ბაზარზე ბოლო 4 თვის განმავლობაში, ფასები იკლებს (ორგანიზაცია ყოველკვირეულ რეჟიმში აკვირდება 200 ყველაზე ხშირად მოხმარებადი მედიკამენტის ფასს).რამდენად ეთანხმებით ამ კვლევის შედეგებს, დაიკლო თუ არა წამლების ფასმა?

- ჩემი ინფორმაციით, გარკვეულ წამლებზე აფთიაქებში ფასები მართლაც შემცირდა. სავარაუდოდ, ეს ფარმაცევტულ ბაზარზე ახალი მოთამაშის „ჰუმანითი ჯოჯიას“ გამოჩენამ გამოიწვია.

ბაზარზე ახალი მოთამაშის გამოჩენა რა გავლენას მოახდენს არსებულ მდგომარეობაზე?

-ახალი კომპანია, „ჰუმანითი ჯორჯია“, შედარებით დაბალ ფასებს სთავაზობს მომხმარებელს, ამიტომ კონკურენცია გაიზარდა. ზოგადად, როდესაც ახალი მოთამაშე ჩნდება ბაზარზე, ეს იწვევს ჯანსაღ კონკურენციას და ხდება ფასების კლება.

თავისუფალ ბაზარზე, როგორც წესი, სახელმწიფო ან მკაცრ რეგულაციას აწესებს, ან კონკურენციას უწყობს ხელს. ახალი მოთამაშის შემოსვლის ხელშეწყობით, სახელმწიფო კონკურენციას ახალისებს. როგორ შეაფასებთ, სახელმწიფოს ამ ნაბიჯს, თავისუფალმა კონკურენციამ თავად უზრუნველყოს ფასების დაწევა მედიკამენტებზე?

-ეს უფრო ჯანსაღი მიდგომაა, ვიდრე ადმინისტრაციული რესურსებით რეგულირება, რადგან თავისუფალ ბაზარს უხდება თავისუფალ მოთამაშეებს შორის ურთიერთობა. ეს უფრო მყარად აყალიბებს შემგომ ხარისხის სტანდარტებსაც და ფასებსაც.

ავტორი: მარიანა ქევხიშვილი