ფედერიკა მოგერინი რუსეთს ნადეჟდა სავჩენკოს დაუყონებლივ გათავისუფლებისკენ მოუწოდებს

მსოფლიო - 14:23, 10 Mar, 2016

1346

ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში ფედერიკა მოგერინი, რუსეთს უკრაინელი მფრინავი ქალის, ნადეჟდა სავჩენკოს დაუყონებლივ გაათავისუფლებისკენ მოუწოდებს.

ამის შესახებ განცხადება ევროკავშირის ოფიციალურ ვებგვერდზე გამოქვეყნდა.

"ეს უკვე იურიდიული და პოლიტიკური საკითხი აღარ არის. ეს უკვე ადამიანური თანაგრძნობის საკითხია. მისი მდგომარეობა სწრაფად უარესდება, ჩვენ ყველას გვეშინია, რომ შედეგები შემზარავი იქნება" - განაცხადა მოგერინიმ.

რამდენიმე წუთის წინ გავრცელებული ცნობით, სავჩენკომ პრეზიდენტ პოროშენკოს თხოვნით მშრალი შიმშილობა შეწყვიტა. პეტრო პოროშენკომ სავჩენკოს გათავისუფლების სანაცვლოდ, რუსეთს ტყვეების გადაცემაც შესთავაზა.

შეგახსენებთ, უკრაინის ტერიტორიული მთლიანობისთვის მებრძოლი 33 წლის მფრინავი, უკრაინის უმაღლესი რადასა და ევროსაბჭოს საპარლამენტო ასამბლეის წევრი ნადეჟდა სავჩენკო 2013 წლის 17 ივნისს სეპარატისტებმა ტყვედ ჩაიგდეს, რუსი ჟურნალისტის მკვლელობაში დასდეს ბრალი და რუსეთის სპეცსამსახურებს გადასცეს.

სასამართლო განაჩენს ნადეჟდა სავჩენკოს საქმეზე 21 ან 22 მარტს გამოიტანენ. ბრალდების მხარე 23 წლიან პატიმრობას და 100 ათასი რუბლის ოდენობით ჯარიმას ითხოვს. სავჩენკოს ამ დროისთვის მშრალი შიმშილობა აქვს გამოცხადებული.

მთელი მსოფლიო მასშტაბით ნადეჟდა სავჩენკოს გათავისუფლების მოთხოვნით აქციები ტარდება.