"ქართული მხარე ვალდებულებას იღებს გამოიტანოს მეჩეთის შიდა სივრციდან ჯვრის გამოსახულების შუა საუკუნეებით დათარიღებული ქვის რელიეფები, რომელიც ექვემდებარება ადგილმონაცველობას" - პრეზიდენტის პრესსპიკერის განცხადებით, ამის შესახებ შეთანხმება თურქულ და ქართულ მხარეს შორის პირველ აპრილს დაიდო.

გარდა ამისა, თურქი ექსპერტები ქართულ მხარესთან ერთად ახალციხეში აშენებულ მე-18 საუკუნის ოსმალურ ძეგლებს რეკონსტრუქციას ჩაუტარებენ და ამ შეთანხმების მიხედვით, "გამოასწორებენ იმ შეცდომებს, რომელიც 2012 წელს ქართველმა არქიტექტორებმა დაუშვეს".
როგორც პრეზიდენტის პრესსპიკერი, მანანა მანჯგალაძე აცხადებს, მთავრობის ეს ინციატივა გაკვირვებას იწევს და პრეზიდენტი ვერ ხედავს პროცესის დაჩქარების აუცილებლობას, მაშინ როცა უახლოეს მომავალში დაგეგმილია მისი ვიზიტი თურქეთში.

როგორც მანჯგალაძემ აღნიშნა, პრეზიდენტი არ განიხილავს ამ საკითხებს, რადგან ეს ნიშნავს რაბათის ციხის განადგურებას, მანჯგალაძის განცხადებით, ადმინისტრაციაში ფიქრობენ, რომ თურქულ მხარეს მსგავსი მოთხოვნა არ ჰქონია.

"საუბარია იმაზე, რომ წინადადება მოდის ქართული მხარიდან. ქრისტიანული სიმბოლოების გადატანა ყოვლად მიუღებელი და დაუშვებელია. საქართველოს მთავრობის შეთავაზება არის სახიფათო და მიუღებელი, რაზეც არასოდეს დათანხმდება პრეზიდენტი"-აცხადებს მანჯგალაძე.
პრეზიდენტის პრესპიკერის განცხადებით, ადმინისტრაცია ითხოვს მთავრობისაგან, საჯაროდ გააკეთოს განცხადება და ამ გადაწყვეტილების მიღების მიზეზი განმარტოს.