"ნიუპოსტი" უცვლელად გთავაზობთ "სამართალდამცავთა ლიგის" მიმართვას ირაკლი ღარიბაშვილისადმი:

ბატონო ირაკლი,

"ბოლო პერიოდში გავრცელდა ინფორმაცია უფლებადამცველ ნანა კაკაბაძის მიერ ამნისტირებულ პატიმართა შეკრების ორგანიზების, გაურკვეველი მიზნებისა და ამოცანების ორგანიზაციის შექმნის თაობაზე.

ჩვენ ყოფილი სამართალდამცავები ვაცნობიერებთ რა საფრთხის შემცველია მსგავსი ორგანიზაციის არსებობა, რომელიც გვაგონებს ე.წ. "მაშველთა კორპუსის" ხელმძღვანელი პირის - ჯაბა იოსელიანის მიერ ყოფილი პატიმრებით დაკომპლექტებული "მხედრიონი"-ს შექმნის ისტორიას, რომლის დაშლასაც ძალოვანმა ორგანოებმა თითქმის 5 წელი მოანდომეს. ამ ორგანიზაციის არსებობას ქვეყანაში მრავალი უდანაშაულო ადამიანისა და მათ შორის არაერთი სამართალდამცავთა სიცოცხლე შეეწირა.

აღსანიშნავია რომ საზოგადოებამ უკვე იხილა, ნანა კაკაბაძის მიერ ორგანიზებული ყოფილ პატიმართა შეკრების შედეგები ეროვნულ ბიბლიოთეკასთან, მათი ძალადობრივი მოწოდებები, რამაც შიდაარეულობის საშიშროების წინაშე დააყენა ქვეყანა და რომ არა, თქვენი ჩარევა და პოლიციელთა თავშეკავებული მოქმედება, შეიძლებოდა ისტერიული ვითარება სხვა სცენარით წარმართულიყო, შეწირულიყო პოლიციელთა ფიზიკური ჯანმრთელობა და სამსახურეობრივი კარიერა.

კარგად ვაცნობიერებთ რა მოქალაქეთა კონსტიტუციურ უფლებას აზრის თავისუფალად გამოხატვის თაობაზე, ვერ დავეთანხმებით და ჩვენთვის მიუღებელია აღნიშნულის გარკვეული პიროვნებების თუ სოციალური ჯგუფების მიმართ შურისძიებაში გადაზრდას.
ბატონო მინისტრო, გთხოვთ სწორად აღიქვათ ჩვენი პოზიცია და მიიღოთ შესაბამისი ზომები შესაძლო ესკალაციის თავიდან ასაცილებლად, რათა დაცული იქნეს ქვეყნის მოქალაქეთა უსაფრთხოება". - ნათქვამია განცხადებაში. 

პატივისცემით
სამართალდამცავთა დაცვის ლიგის
დირექტორი ლ. გვაზავა