ანონსის მიხედვით, გადაცემაში მოწვეული იყვნენ ერთ ოჯახში მცხოვრები რძალი და დედამთლი, რომელებმაც პირდაპირ ეთერში გაარჩიეს თანაცხოვრების დეტალები. გადაცემის მსვლელობისას დედამთილმა რძალს სიტყვიერი და ფიზიკური შეურაცხყოფა მიაყენა.

"მოხვალ სახლში და მერე ნახავ!", - ეუბნება საშუალო ასაკის ქალი ახალგაზრდას, ხოლო მისი პასუხის შემდეგ: "საღამოს პატრულს რომ დაგაყენებ თავზე, მერე ნახავ შენს სეირს!", მუქარას რეალურ ქმედებას აყოლებს: "არც პატრულისა არ მეშინია და მაგ თმებს ღერა-ღერად დაგაცლი!", - რის შემდეგაც გოგოს თმებში წვდება, თუმცა, მათ შორის გადაცემის წამყვანი დგება...

სტუდიაში მიწვეული სტუმრები წამყვანმა წარადგინა, როგორც რძლისა და დედამთილის ნაცნობ-მეგობრები. დისკუსიაში სტუმრებიც ერთვებოდნენ.

იმის გამო, რომ გადაცემის მსვლელობის დროს არ ყოფილა რაიმე სახის მინიშნება მის მოდელირებაზე, ტელეკომპანიის ოფისში ზარები არ წყდებოდა: მაყურებლები სამარცხვინოდ მიიჩნევდნენ ოჯახური დაპირისპირების ასე აფიშირებას და ზოგიერთი მაყურებელი გადაცემის შეწყვეტასაც ითხოვდა.

თუმცა, მალევე ყველაფერი გაირკვა, როცა გადაცემის ბოლოს წამყვანმა გამოაცხადა, რომ დღეს პირველი აპრილია და სინამდვილეში, ერთმანეთს სამკვდრო-სასიცოცხლოდ სტუდიაში გადაკიდებული ქალები არა რძალ-დედამთილი, არამედ მსახიობები იყვნენ...

მოგვიანებით, გადაცემის ფრაგმენტი შიდა ქართლის საინფორმაციო ცენტრმა ცალკე ატვირთა ვიდეოპორტალებზე და სოციალურ ქსელშიც გავრცელდა. ვიდეომასალა მოკლე ხანში გახდა პოპულარული.

ვიდეოს ნახვა