თეატრმცოდნე ლაშა ჩხარტიშვილი მიიჩნევს, რომ სტურუამ თეატრში რეპრესიები დაიწყო. "კვირის პალიტრა" ამ და სხვა საკითხებზე სასაუბროდ რობერტ სტურუას დაუკავშირდა.

"თეატრმცოდნეებს თავიანთი აზრი აქვთ. წინასწარმეტყველებენ რაღაცებს და სამხატვრო ხელმძღვანელი თუ რამეს გადაწყვეტს, ჰგონიათ, არიქა, რეპრესიები დაიწყოო. ვის უნდა გავუსწორო ანგარიში?! მსახიობები ძალიან მიყვარს და არ აქვს მნიშვნელობა, რომელ პარტიაში არიან. ვთქვი კიდეც, არ მაინტერესებს თქვენი პარტიულობა-მეთქი", - აღნიშნავს სტურუა.

სტურუა ხუხაშვილის მიერ გავრცელებულ წერილსაც ეხმაურება:

"ძალიან კარგად ვიცი ჩვენი ბობოლა მთავრობის წევრები პუტინის მისაღებში რომ ისხდნენ და მასთან აუდიენციას რომ უცდიდნენ, მაგრამ არ მიიღეს. ეს ბოლო პერიოდში ხდებოდა, როცა იგრძნეს, რომ შეიძლებოდა წაეგოთ. რაც შეეხება ვაშაძეს, ისედაც ყველაფერი ვიცოდი. ეს წერილი არ წამიკითხავს, მაგრამ ყველაფერს ვგრძნობდი. თუმცა, ომის შემდეგ სამ თვეში თუ მისწერდა ასეთ წერილს ვერ წარმოვიდგენდი", - ამბობს რობერტ სტურუა.

სტურუა ნანობს რუსთაველის თეატრში რომ დაბრუნდა:

"ჩემი აზრით, დიდი შეცდომა დავუშვი, რუსთაველის თეატრში რომ დავბრუნდი. მოხვიდე-წახვიდე - სისულელეა. მაგრამ ვთვლი, რომ არ უნდა მოვსულიყავი. შესანიშნავად წავედი, არ ვუღალატე რუსთაველის თეატრის ტრადიციებს. სამხატვრო ხელმძღვანელებს სულ ყრიდნენ, სანდრო ახმეტელი დახვრიტეს კიდეც. მსახიობების ჯგუფი გადაასახლეს, შემდეგ თუმანიშვილი გააგდეს, ალექსიძე ... მეც ისეთივე "ლოგიკით" გამიშვეს", - დასძენს სტურუა.