რამდენიმე ათეული წელია, რაც არ წყდება მომლოცველთა ნაკადი "ჩილკურ ბალაჯის" ინდურ ტაძართან, რომელიც, გავრცელებული ხმების თანახმად, მათ აშშ-სა და სხვა ქვეყნების ვიზების აღებაში ეხმარება.

ტაძარი დაახლოებით 500 წლის წინ იყო აშენებული და ის უფალი ბალაჯის, ინდუისტური ღმერთი ვიშნუს ერთერთი განსხეულების სახელობისაა.

მლოცველები ვიზების მოსაპოვებლად გარკვეულ რიტუალს ასრულებენ. ისინი საკურთხეველზე ახალ ქოქოსსა და საზღვარგარეთულ პასპორტებს დებენ და კომპლექსის შიდა ტაძრის ირგვლივ ლოცვით 11 წრეს აკეთებენ. მათი თხოვნის ასრულების შემთხვევაში, ისინი კვლავ ბრუნდებიან ტაძარში და კიდევ 108 წრეს უვლიან მას.

ეს ტრადიცია სათავეს იღებს იმ დროიდან, როდესაც ათწლეულების წინ აშშ-ში სწავლის გაგრძელების მსურველმა სტუდენტებმა მსგავსი რიტუალი პირველად ჩაატარა. როგორც ამბობენ, მათგან რამოდენიმეს გაუმართლა და ტაძარს მას შემდეგ "ვიზების ტაძარი" დაარქვეს.

მას შემდეგ, ტაძარმა ნელნელა პოპულარობა მოიპოვა, რაშიც ხელს სპეციალურად გამოშვებული ბროშურები და სხვა სარეკლამო ხასიათის მასალა უწყობს.

"ჩემი და ამჟამად ბელგიაშია, ბრიუსელში, მას უფალმა გადმოხედა და მე მჯერა, რომ ასევე გამიმართლებს," - აცხადებს CNN-თან ინტერვიუში ახალგაზრდა მანჯუნათ სინგჰი.