ვილნიუსის ქუჩას ან სკვერს ბორის ნემცოვის სახელი დაერქმევა

მსოფლიო - 18:45, 25 Feb, 2016

1769

ლიტვის დედაქალაქში ერთ-ერთ ქუჩას ან სკვერს მოკლული რუსი ოპოზიციონერის, ბორის ნემცოვის სახელი დაერქმევა. ამის შესახებ გადაწყვეტილება ვილნიუსის საქალაქო საბჭომ მიიღო. როგორც საბჭოს რეზოლუციაშია ნათქვამი, ლიტვის დედაქალაქში ქუჩისა ან სკვერისთვის ნემცოვის სახელის მინიჭება დაადასტურებს, რომ ლიტვა დემოკრატიას უჭერს მხარს.შეგახსენებთ, რუსი ოპოზიციონერი ბორის ნემცოვი, 27 თებერვალს კრემლთან ახლოს ხიდზე მოკლეს. პოლიციამ, მკვლელობაში ეჭვმიტანილი 5 ადამიანი დააკავა. ერთერთმა ეჭვმიტანილმა, ზაურ დადაევმა აღიარებითი ჩვენებაც მისცა და განაცხდა, რომ ნემცოვი მუჰამედ წინასწარმეტყველის შესახებ ნეგატიური განცხადებების გაკეთებისა და "შარლი ებდო-ს" კარიკატურების მხარდაჭერის გამო მოკლა. მოგვიანებით, მან ჩვენება შეცვალა, დანაშაული უარყო და განაცხადა, რომ წინასწარ გამზადებულ ჩვენებაზე ხელის მოწერა აიძულეს.

გავრცელებული ინფორმაციით, საქმეში არსებობს ვიდეოჩანაწერები, რომლებიც 2015 წლის 28 თებერვლიდან 1 მარტამდე არის გაკეთებული და რომელზეც მკვლელობისთვის მზადების დეტალებია ასახული. მედიის ცნობით, ერთი ჩანაწერი მკვლელობაში ეჭვმიტანილებს - ანზორ გუბაშევსა და ბესლავ შავანოვს ეხება. ჩანაწერები გროზნოს აეროპორტშია გადღებული. მეორე ჩანაწერის კადრებშიც, რუსლან გერემეევი, ზაურ დადაევი და რუსლან მუხუდინოვი აეროპორტში არიან დაფიქსირებული.

ბორის ნემცოვის ოჯახი მკვლელობის ორგანიზატორებისა და შემკვეთების დასჯასა და ობიექტურ გამოძიებას მოითხოვს.