რუხის სავაჭრო ცენტრი ოპერირებისთვის მზად არის

ბიზნესი & ეკონომიკა - 16:34, 20 Feb, 2016

2096

ზუგდიდის რაიონში მდებარე რუხის სავაჭრო ცენტრი, რომლის მშენებლობა საპარტნიორო ფონდმა იანვრის ბოლოს დაასრულა, პრემიერ მინისტრმა გიორგი კვირიკაშვილმა საპარტნიორო ფონდის ხელმძღვანელობასთან ერთად მოინახულა.

ფონდის აღმასრულებელი დირექტორის დავით საგანელიძის განცხადებით, რუხის სავაჭრო ცენტრის ფუნქციონირებს რეგიონის განვითარებას უფრო მეტად შეუწყობს ხელს. „ეს არის მნიშვნელოვანი სავაჭრო კომპლექსი, სადაც წარმოდგენილია ძალიან ბევრი ადგილობრივი კომპანია და ეს მათთვის არის დიდი მოტივაცია. აქ რეგიონის მოსახლეობას მიეცა საშუალება ისარგებლოს იმ სერვისებით, რაც აქამდე არ იყო შესაძლებელი. გარდა ამისა, ადგილობრივებს ინფრასტრუქტურის განვითარების და დასაქმების მეტი არჩევანი მიეცა, რაც მნიშვნელოვნად აისახება მათ შემოსავლებზე“, განაცხადა საგანელიძემ.

ამ ეტაპზე მრავალფუნქციური სავაჭრო ცენტრი სრული დატვირთვით ოპერირებისთვის ემზადება. ადგილობრივი და ასევე საერთაშორისო ბრენდირებული და არაბრენდირებული კომპანიები პროდუქციის მობილიზებასა და სავაჭრო ფართის ინტერიერის მოწყობის სამუშაოებს ახორციელებენ. კომპანიების სრულყოფილი ფუნქციონირებისთვის ფონდმა მიმზიდველი კომერციული და ტექნიკური პირობები შექმნა.

სავაჭრო ცენტრში წარმოდგენილია საცალო და საბითუმო მაღაზიები, ავეჯისა და ტექნიკის მაღაზიები, ჰიპერმარკეტი, ღია ტიპის ბაზარი, იუსტიციის სამინისტროს საზოგადოებრივი ცენტრი, საფინანსო და საბანკო მომსახურების ობიექტები, ავტოსერვისი, ფოსტა, აფთიაქი და სხვა.

შენობების საერთო ფართი 10 000 მ2-ს შეადგენს, კომპლექსი ჯამში 10 შენობითაა წარმოდგენილი, ხოლო სავაჭრო ცენტრის საერთო განაშენიანების ფართობი 5 ჰექტარია.

შენობები აგებულია ევროპული სტანდარტის დაცვით, რომელიც მიღებულია ამ ტიპის ობიქტების მშენებლობაში. სავაჭრო ფართები აღჭურვილია განათების, ვენტილაცია/კონდიცირების, გათბობის თანამედროვე სისტემებით.

სამშენებლო სამუშაოები 2015 წლის სექტემბერში დაიწყო და 2016 წლის იანვარში დასრულდა. მშენებლობის პროცესში ობიექტზე დასაქმებული იყო 300 ადგილობრივი მაცხოვრებელი. ცენტრის გახსნის შემდეგ კი მუდმივად 1000-მდე სამუშაო ადგილი შეიქმნება, რაც პირდაპირ აისახება ამ რეგიონის მოსახლეობის ეკონომიკური ცხოვრების გაუმჯობესებაზე.

პროექტის ღირებულება 15 მლნ ლარამდეა. სავაჭრო ცენტრის მშენებლობა და მისი ფუნქციონირების უზრუნველყოფა საპარტნიორო ფონდის მიერ განხორციელდა.

რუხის მრავალფუნქციური სავაჭრო ცენტრი სრულყოფილ ოპერირებას გაზაფხულზე დაიწყებს.