მსხვერპლი რომელსაც ვიღებთ, ჩვენი მოთმინების ფიალას ავსებს- ერდოღანი

მსოფლიო - 11:57, 18 Feb, 2016

6118

თურქეთის პრეზიდენტი რეჯეპ ტაიპ ერდოღანი პირობას დებს, რომ თურქეთი ტერორიზმთან ბრძოლას გააგრძელებს, როგორც თავის ტერიტორიაზე ისევე მის ფარგლებს გარეთაც.

„ჩვენ აღშფოთებულები ვგმობთ ანკარაში მომხდარ ტერაქტს. ჩვენ არ გადავუხვევთ ტერორიზმთან ბრძოლის გზას და ამ საქმეს გავაგრძელებთ, როგორც თურქეთში, ასევე მის საზღვრებს გარეთაც. მსხვერპლი, რომელსაც ვიღებთ, ჩვენი მოთმინების ფიალას ავსებს. ეს ტერორისტული აქტები, რომლებიც ჩვენი ერის ერთიანობისა და თანასწორობის წინააღმდეგ არის მიმართული, პირიქით გვაერთიანებს ამ ბოროტების ძალების წინააღმდეგ ბრძოლაში. თურქეთის თავდაცვის ლეგიტიმური უფლება განხილვას არ ექვემდებარება, ჩვენ ამ უფლებას გამოვიყენებთ ყველგან და ყოველთვის, როცა ამას საჭიროდ ჩავთვლით. ძალები, რომლებსაც ტერორისტული ორგანიზაციები ჩვენს წინააღმდეგ იყენებენ ცდებიან იმაში, რომ გონიათ ჩვენს სამართლიან პოზიციას შეგვაცვლევინებენ და განვითარების გზიდან გადაგვახვევინებენ, თითოეული გმირი, რომელმაც სიცოცხლე თავისი სამშობლოს თავისუფლებისა და დამოუკიდებლობისთვის გაწირა, მტკიცებულებაა იმისა, რომ თურქეთი ერთიანი და განუყოფელია და ჩვენი დროშა არასოდეს დაეშვება“ -განაცხადა ერდოღანმა.

შეგახსენებთ, 17 თებერვალს დანაღმული ავტომობილი თურქეთის დედაქალაქში ადგილობრივი დროით 18:31-ზე აფეთქდა. აფეთქება პარლამენტის და გენშტაბის შენობებიდან არც თუ ისე შორს მოხდა. ტერაქტი მაშინ მოხდა, როდესაც ავტომობილების კოლონა, რომელსაც სამხედროები გადაჰყავდა შუქნიშანის წითელ შუქზე გაჩერდა. ბოლო ცნობებით დაღუპულია 28 და დაჭრილია 61 ადამიანი.