პატარას დედა 3 წლის წინ გარდაეცვალა - რა ბედი ელის ქობულეთელ მოძალადე მამას?!

კრიმინალი - 14:03, 17 Feb, 2016

7061

სისხლჩაქცევები ყურებზე, საფეთქელზე და ფეხის მიდამოში - ამ დაზიანებებით მიიყვანა 4 წლის ავთო მამამ კერძო ბაღში გუშინ დილით.

„რაო-რაოს“ დირექცია შეშფოთდა იმ დაზიანებებით, რომელიც ბავშვს სხეულზე აღენიშნებოდა. ამიტომ ბაღის დირექტორმა დახმარებისთვის სოციალური მომსახურების სააგენტოს მიმართა.

სოც.მუშაკმა თამარ ღუნაშვილმა მცირეწლოვნის ქობულეთის სამედიცინო ცენტრში გადაყვანის გადაწყვეტილება მიიღო. ბავშვი სოციალურ მუშაკთან და სამართალდამცავებთან ერთად ბათუმის სამხარაულის ექსპერტიზის ბიუროშიც გადაიყვანეს.

მოძალადე მამა, რომელმაც 4 წლის ბავშვის ცემაშია ეჭვმიტანილი შს სამმართველოში გუშინვე დაკითხეს. შსს-ს განმარტებით, მომხდარზე გამოძიება სისხლის სამართლის კოდექსის 126-ე მუხლის მეორე ნაწილით დაიწყო, რაც 1-დან 3 წლამდე ვადით პატიმრობას ითვალისწინებს.

რაც შეეხება პატარას ჯანმრთელობის მდგომარეობას, როგორც „ნიუპოსტს“ ქობულეთის სამედიცინო ცენტრის მთავარმა მენეჯერმა რაულ პაქსაძემ განუცხადა, პაციენტი უკვე გაწერეს სამედიცინო დაწესებულებიდან.

„პაციენტი კლინიკაში 18:30 საათზე შემოიყვანეს. პატარას სისხლჩაქცევა ორივე ბარძაყზე და თავის მიდამოებში აღენიშნებოდა. ჩაუტარდა კომპიუტერული ტომოგრაფია. მის სიცოცხლეს საფრთხე არ ემუქრება, ამიტომ ექიმმა ის უკვე გაწერა“- აღნიშნა კლინიკის წარმომადგენელმა.

„ნიუპოსტმა“ ის სოციალური მუშაკიც ჩაწერა, რომელმაც ბავშვი კლინიკაში შემდეგ კი ექსპერტიზაზე წაიყვანა.

თამარ ღუნაშვილი აცხადებს, რომ პატარა ბათუმში სოციალური მუშაკების ზედამხედველობის ქვეშ იმყოფება.

მისი თქმით, მამის მიერ ბავშვზე ძალადობა სოფელ ცეცხლაურში 16 თებერვალს განხორციელდა.

„ბავშვს სახის არეში ძლიერი ჩაქცევები აღენიშნებოდა. დაჟეჟილობა აღენიშნებოდა ასევე ორივე ბარძაყზე. როგორც სოციალურმა მუშაკმა, ვალდებულება ავიღე, დაშავებული სამედიცინო დაწესებულებაში გადაყვანილიყო, რომ შეემოწმებინათ ექიმებს, ჰქონდა თუ არა ადგილი შინაგან დაზიანებებს “ - აღნიშნა სოც.მუშაკმა.

- მამის მიერ ბავშვზე ძალადობის შესახებ საიდან გახდა თქვენთვის ცნობილი დედა დაგიკავშირდათ?

- იმ ბაღის გამგე დამიკავშირდა, სადაც მამამ ნაცემი შვილი მიიყვანა.

- თუ არის თქვენთვის მომხდარის დეტალები ცნობილი?

- დაუსტებით იმის თქმა, რომ ბავშვზე აქამდეც იყო ძალადობა შეუძლებელია, რადგან ეს ფაქტი ბაღიდან გამჟავნდა. რისთვისაც მადლობა მინდა გადავუხადო აღნიშნული ბაღის გამგეს, რომელიც შეაშფოთა ნანახმა და დაგვიკავშირდა. რაც შეეხება სხვა დეტალებს, მე როგორც ვიცი ბავშვს დედა სამი წლის წინ გარდაეცვალა. ის მამასთან ერთად იზრდებოდა.

დავით ჯაბაშვილი