წილის გაყიდვას არ ვაპირებ - მაკა ასათიანი "მაესტროში" მივიდა

საზოგადოება - 17:24, 09 Feb, 2016

4484

"მაესტროს" 25%-იანი წილის მფლობელი მაკა ასათიანი ტელევიზიაში იმყოფება. როგორც "ნიუპოსტის" კორესპოდენტი ადგილიდან იტყობინება, ასათიანმა "მაესტროს" ირგვლივ განვითარებულ პროცესებზე ადგილზე შეკრებილ ჟურნალისტებთან მორიგი განცხადებაბი გააკეთა.

მაკა ასათიანი, ირაკლი რუხაძის მიერ გავრცელებულ ინფორმაციას წილის გაყიდვასთან დაკავშირებით მიმდინარე მოლაპარაკებების თაობაზე არ ადასტურებს.

"წილის გაყიდვას არ ვაპირებ"- თქვა მან.

"მაესტროს" 25 პროცენტიანი წილის მფლობელის განცხადებით, ბოლო წლის განმავლობაში "მაესტროს" წილების შესყიდვასთან დაკავშირებით, ტელეკომპანიას არაერთი შეთავაზება ჰქონდა, თუმცა კონკრეტული გვარები და კომპანიების სახელები, რომლებსაც "მაესტროს" წილების შესყიდვა სურდა, არ ახსოვს.

ჟურბალისტებთან საუბრისას ასათიანმა "მაესტროში" ლევან გაჩეჩილაძის მისვლის შესახებაც ისაუბრა და თქვა, რომ ლევან გაჩეჩილაძეს შენობაში შესვლის პრობლემა არ ექნება, თუმცა როგორც დირექტორი ის შენობაში ვერ მოხვდება.

"გუნდმა პასუხი გასცა ყველაფერს და მე ვარ გუნდის წევრი. მე ვარ იქ, სადაც არის ჩემი გუნდი და წინააღმდეგი ვარ ძალადობის. საშვის დაშვების შემდეგ ყველას აქვს უფლება შენობაში შემოვიდეს. გია გაჩეჩილაძეს, რომელიც დამფუძნებელია, შენობაში მოსვლის უფლება აქვს, ამაში პრობლემა არ შეექმნება არც ლევან გაჩეჩილაძეს" - განაცხადა მაკა ასათიანმა.

რაც შეეხება "მაესტროს" 3 თანამშრომლის განსხვავებულ პოზიციას, ასათიანმა ფაქტს მტკივნეული თემა უწოდა.

" ძალიან განვიცადე, რომ 3 ადამიანი ერთობლიობას დაარღვევდა, ალბათ, ჩემი მხრიდანაც იყო გარკვეული შეცდომები, რადგან მათ გუნდის გაერთიანებაში ეჭვი შეიტანეს"- თქვა მან.