ბიანკა შიგუროვას ლანჩხუთში დღეს გადაასვენებენ - მივა თუ არა გასვენებაში მისი დედა?

საზოგადოება - 10:44, 05 Feb, 2016

21572

22 წლის ტრანსგენდერ ქალს- ბიანკა შიგუროვას თბილისიდან ლანჩხუთში დღეს გადაასვენებენ.

როგორც სოფელ ორმეთის მაჟორიტარმა დეპუტატმა, თემურ მარშანიშვილმა "ნიუპოსტის" ადგილობრივ კორესპოდენტს უთხრა, გარდაცვლილ შიგუროვას ცხედარს ორმეთში დაახლოებით 3 საათისთვის გადმოასვენებენ.

"მანქანა უკვე გაგზავნილი გვყავს თბილისში და რამდენიმე საათში გადმოასვენებენ. გუშინ გვიან ღამემდე ვიყავი მეც და პოლიციაც გარდაცვლილის სახლში. ხალხიც ბევრი იყო. ადრე, იყო რაღაც პრობლემები, მოგეხსენებათ სოფლის ახალგაზრდობის დამოკიდებულება მსგავსი საკითხების მიმართ, მაგრამ ახლა ყველას ეცოდება"- თქვა მან.

შიგუროვა ლანჩხუთის მუნიციპალიტეტის სოფელ ორმეთში დაიბადა, სოფლიდან წასვლამდე ის ბებიასთან ერთად ცხოვრობდა.

სოფელ ორმეთში, ბიანკას სახლში ახლა მოხუცი ბებია, მისი და და მამა ცხოვრობს.

რაც შეეხება ბიანკას დედას, მას შვილთან ურთიერთობა გაწყვეტილი ჰქონდა. ქალბატონი ურეკში ცხოვრობს.

ბიანკა შიგუროვა გარდაცვლილი ნაქირავებ ბინაში იპოვეს. მეზობლების ინფორმაციით, ის, სავარაუდოდ, 3-4 დღის წინ დაიღუპა. თუმცა, მისი ცხედარი გუშინ ნახეს.

წინასწარი ინფორმაციით, ბიანკა გაზის გაჟონვის შედეგად დაიღუპა. 22 წლის ტრანსგენდერი ქალი ბიანკა შიგუროვა ლანჩხუთში დაიბადა.

მომხდარ ფაქტს შს სამინისტროში ადასტურებენ. გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.