თიანეთის ინდივიდუალური გამრიცხველიანება დასრულდა

საზოგადოება - 14:41, 04 Feb, 2016

605

სს ენერგო-პრო ჯორჯიამ მთლიანად დაასრულა თიანეთის რაიონის სოფლების გამრიცხველიანება. ევროპული სტანდარტების ინდივიდუალური მრიცხველები საერთო ჯამში დაუმონტაჟდა 6358 აბონენტს, 51 სოფელში. თიანეთში გამრიცხველიანების პროექტის განხორციელების მიზნით, სს ენერგო-პრო ჯორჯიამ განახორციელა 2 225 300 ლარის ინვესტიცია.

აბონენტების ინდივიდუალური გამრიცხველიანება არ გულისხმობს მხოლოდ ინდივიდუალური მრიცხველების მონტაჟს, ის მოიცავს ქსელის რეაბილიტაციასაც; შესაბამისად, სარეაბილიტაციო სამუშაოების ფარგლებში თიანეთში ძველი ამორტიზირებული დგარები შეიცვალა 2000-მდე რკინა-ბეტონის საყრდენით, დაზიანებული საკაბელო სისტემა შეიცვალა ახალი 225 067 მ სიგრძის თანამედროვე კაბელით და ა.შ. ქსელის რეაბილიტაციის შედეგად, აღნიშნულ რეგიონში მოეწყო საიმედო ქსელის ინფრასტრუქტურა, რაც თავის მხრივ გააუმჯობესებს ელექტროენერგიის მიწოდების ხარისხს და მას უფრო სტაბილურს გახდის.

თიანეთთან ერთად, უკვე მთლიანად დასრულებულია ლანჩხუთის, აბაშის, სენაკის, წალენჯიხის, ბაღდათის, ასპინძის, ახალციხის, ბორჯომის, მცხეთისა და ყაზბეგის რაიონების სოფლების გამრიცხველიანება; აგრეთვე, საქართველოს რეგიონებში დასრულებულია ყველა ქალაქის გამრიცხველიანებაც.

„რეგიონების ინდივიდუალური გამრიცხველიანება გრძელდება. ის ჩვენი კომპანიისთვის ერთერთი პრიორიტეტული პროექტია. ტექნიკური სამსახური მაქსიმალურად ცდილობს სამუშაოები წარმართოს ეფექტურად, რაც გვეხმარება აბონენტების მომსახურების ხარისხის გაუმჯობესებაში. გამრიცხველიანების უმნიშვნელოვანესი პროცესის მთლიანად დასრულების შემდეგ, კომპანიის ტექნიკური სამსახური დაიწყებს საშუალო და მაღალი ძაბვის ქსელის რეაბილიტაციას.“ – განაცხადა სს ენერგო–პრო ჯორჯიას საზოგადოებასთან ურთიერთობის სამსახურის უფროსმა ავთო დვალიშვილმა.