სოსო ჯაჭვლიანის მიერ პარლამენტში ინიცირებულ კანონპროექტს, რომლის მიხედვითაც რელიგიური გრძნობების შეურაცხყოფა დასჯადი ქმედება ხდება, ქართველ მუსლიმთა კავშირის თავმჯდომარე ტარიელ ნაკაიძე საფრთხის შემცველად მიიჩნევს. ქართველ მუსლიმთა კავშირის განცხადებას „ნიუპოსტი“ უცვლელად გთავაზობთ:

რელიგიური ორგანიზაცია ქართველ მუსლიმთა კავშირი ვეხმაურებით რა, „საქართველოს ადმინისტრაციულ სამართალდარღვევათა კოდექსში” შესატანი ცვლილებების კანონპროექტს, რომლის თანახმად, მორწმუნეთა გრძნობების შეურაცხყოფა და რელიგიური სიწმინდეებისა და საკულტო ნაგებობების წაბილწვა გამოიწვევს დაჯარიმებას.

ჩვენი მიზანია ხელი შევუწყოთ რელიგიის თავისუფლების დაცვას, რაც ამავდროულად გულისხმობს, როგორც გამოხატვის თავისუფლების, ასევე რელიგიის თავისუფლების დაცვას, იმგვარად, რომ ერთი მეორესთან არ უნდა მოდიოდეს წინააღმდეგობაში.

ჩვენ ვგმობთ ყოველგვარ ძალადობას, სიძულვილის გამოხატვას; ჩვენ ვგმობთ დაპირისპირებასა და განხეთქილების ჩამოგდების მცდელობებს სხვადასხვა იდენტობის ჯგუფებსა და ადამიანებს შორის, მით უფრო, რომ წლების განმავლობაში, ხშირად გავმხდარვართ შეუწყნარებელი და დისკრიმინაციული მოპყრობის მსხვერპლნი. მაშინ, როდესაც გაცილებით უფრო მნიშვნელოვან შრეზეა პრობლემა, როდესაც დაუსჯელია დისკრიმინაციის, რელიგიის ნიადაგზე დევნის, რიტუალების აღსრულებისთვის ხელის შეშლის, (ნიგვზიანი, წინწყარო, ქობულეთი და სხვა) მრავალი შემთხვევა და როდესაც ამ ტიპის დანაშაულზე რეაგირების კუთხით სახელმწიფო მეტად პასიურ პოზიციას იკავებს, ხსენებული კანონპროექტი ჩვენში არაერთ შეკითხვას ბადებს. ამრიგად მიგვაჩნია, რომ აღნიშნული კანონპროექტის კანონად ქცევა შეზღუდავს გამოხატვისა და სიტყვის თავისუფლებას და უფრო მეტიც, საშიშია არ იქცეს იმ უმრავლესობის მთავარ ბერკეტად, რომლებიც ხშირად გვევლინებიან უფლებების უხეშ დამრღვევებად.

ტარიელ ნაკაიძე
ქართველ მუსლიმთა კავშირის თავმჯდომარე